İtaliyada həkimlər iki gün başında qrossbov (arbalet) oxu ilə yaşayan yerli sakini xilas ediblər.
Bizim.Media xəbər verir ki, bu barədə “Corriere della Sera” nəşri məlumat yayıb.
Hadisə Ankona şəhərində baş verib. Yerli xəstəxananın neyrocərrahiyyə şöbəsinin müdiri, professor Mauritsio Yakoandjelinin sözlərinə görə, 64 yaşlı pasiyent təcili yardım maşını ilə xəstəxanaya çatdırılıb.
Ox xəstənin alınından girərək bütün kəlləni keçib və ensə hissəsindən çıxıb. Professor bildirib ki, bu cür zədə ilə sağ qalmaq möcüzədir, lakin kişi sadəcə sağ qalmayıb, iki gün bu yad cismlə yaşayıb və xəstəxanaya yerləşdiriləndə huşu yerində olub.
Professorun sözlərinə görə, ox beynin həyati vacib mərkəzlərinə toxunmayıb. Həkimlər yad cismi çıxarıblar və pasiyenti reanimasiya şöbəsinə yerləşdiriblər.
Onun vəziyyəti ağırdır və həkimlər həyatını xilas etməyə çalışırlar.
Bizim.Media
