Hələ də əsgərlik yaşının dəyişdirilməsi ilə bağlı müzakirələr ictimaiyyətin diqqətindədir. Bəzi fikirlərə görə, çağırış yaşı artırıla bilər.
Bəs, bu addım atılarsa, uyğun yaş neçə olmalıdır?
Mövzu ilə bağlı Bizim.Media-ya açıqlama verən millət vəkili Aqil Abbas bildirib ki, əsgərlik üçün ən uyğun yaş məhz 18-dir:
“Əlbəttə, bu mövzuda şəxsi fikrim var. Düşünmürəm ki, 18 yaş əsgərlik üçün tam uyğun yaş deyil. Əksinə, elə əsl əsgərlik yaşı 18-dir. Bu yaşda gənclər həyatla yeni tanış olur, dünyanı dərk etməyə başlayır. Ömürlərinin ən enerjili, sağlam və formalaşma dövründədirlər. Elə bu dönəmdə əsgərlik onlara tərbiyə, məsuliyyət və həyat dərsi verir”, - deyə deputat qeyd edib.
Aqil Abbas hesab edir ki, çağırış yaşının artırılması effektiv nəticə verməz:
“Bundan daha yuxarı yaşda gəncləri əsgər aparmağın ciddi faydası yoxdur. O dövrdə artıq fərdin öz planları, ailə məsuliyyəti, iş həyatı formalaşır. Əsgərlik bu mərhələdə yükə çevrilə bilər. 18 yaş isə həm fiziki, həm psixoloji baxımdan tam uyğun dövrdür”, - deyə o, bildirib.
Aygün Hüseyn, Bizim.Media
