İranın Azərbaycandakı keçmiş səfiri Seyid Abbas Musəvinin İranın ölkəmizdəki digər keçmiş səfiri Möhsün Pakayinin Qarabağ münaqişəsinə həsr olunmuş kitabının təqdimat mərasimində çıxışı ilə bağlı bəzi mətbuat orqanlarında əsassız iddialar yayılıb.
Bizim.Media apa.az-a istinadən xəbər verir ki, guya Seyid Abbas Musəvi çıxışında Azərbaycanın qonşu dövlətlərdən birini işğal etmiş ölkə olduğunu söyləyib.
Lakin keçmiş səfirin çıxışının orijinal mətni ilə tanış olanda aydın olur ki, ciddi yanlışlığa yol verilib. Mümkündür ki, Seyid Abbas Musəvinin sözləri ya bilərəkdən təhrif edilib Azərbaycan cəmiyyətinə çatdırılıb, yaxud da tərcümə xətasına yol verilib.
Əslində isə Seyid Abbas Musəvi çıxışında bildirib ki, İran İslam Respublikası həmişə öz prinsipləri, Ali Rəhbərin xarici siyasətdə elan etdiyi prinsiplər əsasında hərəkət edib:
“Separatizmə, zora qarşı çıxmaq siyasəti İranın inandığı prinsiplərdən biridir”.
Keçmiş səfir sözünə belə davam edib:
“Ermənistan qonşu ölkələrdən birini işğal etmiş ölkə idi. Biz vasitəçilik edərək, əvvəlcə tərəfləri münaqişəsinin həllinə dair sülh sazişinin imzalanmasına yaxınlaşdırdıq, lakin qərb ölkələrinin maraqları buna imkan vermədi. Biz ağıllı olaraq İranın Qafqazdakı mövcudluğunu sabitləşdirə və regionu öz maraqlarımıza yaxınlaşdıra bildik”.
Diplomat İranın İkinci Qarabağ Müharibəsində mövqeyinə də toxunub, İslam Respublikasının bu münaqişədə bitərəf qaldığını söyləyib:
“Azərbaycan xalqı əvvəl hesab edirdi ki, İran Ermənistana meyllidir, lakin rəhbəri mövqeyi bu nöqteyi-nəzəri dəyişdirdi”.
Bəzi dairələrin İran-Azərbaycan münasibətlərini münaqişə vəziyyətinə gətirdiyini vurğulayan keçmiş səfir “Bəlkə də çoxları bu əlaqələrin kəsilməsini istəyirdi, amma dövlətin planı başqa idi. Şəhid Rəisinin (İranın helikopter qəzasında həlak olan prezidenti İbrahim Rəisi-red.) İlham Əliyevlə son görüşü çox yaxşı keçdi və səfirlik yenidən açılmalı idi”, - deyə bildirib.
Musəvi xatırladıb ki, Qafqaz İranın təsir dairəsindədir və onlar burada mövcud olmalıdırlar:
“Fürsətlərdən istifadə edilməlidir, Qarabağ münaqişəsinin mövcud olduğu üç onillik ərzində İranın iqtisadi imkanları əlindən alındı. Qərb ölkələri İranı və Rusiyanı Qafqazdan qovmağa çalışır, lakin biz bəyan etdik ki, bura bizim regiondur, biz yox, onlar getməlidirlər”.
Keçmiş səfir onu da əlavə edib ki, İranın xəbərdarlığı olmasaydı, Qərbin hazırladığı oyun baş tuta bilərdi.
“Naxçıvanla Bakının əlaqəsi İrandan keçir. Biz otuz ildir ki, onları mühüm marşrut olan bu marşrutla təmin etmişik”, - deyə diplomat fikrini yekunlaşdırıb.
Bizim.Media
![İranın Azərbaycandakı keçmiş səfiri: Ermənistan qonşu ölkələrdən birini işğal etmişdi İranın Azərbaycandakı keçmiş səfiri: Ermənistan qonşu ölkələrdən birini işğal etmişdi](https://bizim.media/file/articles/2024/08/08/1723136388_1.jpg)
- A-
- A
- A+
Dünya
20:56 / 08.08.2024
İranın Azərbaycandakı keçmiş səfiri: Ermənistan qonşu ölkələrdən birini işğal etmişdi
Hazırda oxunan: İranın Azərbaycandakı keçmiş səfiri: Ermənistan qonşu ölkələrdən birini işğal etmişdi
Hazırda oxunan: İranın Azərbaycandakı keçmiş səfiri: Ermənistan qonşu ölkələrdən birini işğal etmişdi
205746
© Materiallardan istifadə edərkən hiperlinklə istinad olunmalıdır.
Mətndə səhv varsa, onu qeyd edib ctrl + enter düyməsini basaraq bizə göndərin.
Mətndə səhv varsa, onu qeyd edib ctrl + enter düyməsini basaraq bizə göndərin.