Həyatımızın ayrılmaz hissəsinə çevrilən sosial şəbəklərdən dünyanın bir çox ölkələrində insanlar gəlir mənbəyi kimi istifadə edir.
Azərbaycanda da sosial şəbəkə üzərindən gəlir əldə edənlər kifayət qədərdir. Xüsusilə də, asan yoldan pul qazanmaq istəyənlər “TikTok”platformasına üz tuturlar. İnsanları ən çox düşündürən suallardan biri isə budur:
“TikTok”da pulu necə qazanırlar?
MÖVZU İLƏ BAĞLI:
“Tiktok”la bağlı araşdırmalar BAŞLAYIR – Şirkət cəzalandırıla BİLƏR
Əvvəllər, hər kəsin yüngül əyləncə məkanı hesab etdiyi bu platformadan hazırda ciddi məbləğdə pul qazanan insanlar var.
Bəziləri “TikTok”dan ağıllı şəkildə istifadə etsələr də, bəziləri ağlasığmaz əməllərinə azyaşlı övladlarını da daxil edib, bunun üzərindən pul qazanırlar.
Bəs, yetkinlik yaşına çatmayan və üstəlik bu sosial şəbəkənin nə olduğunu dərk etməyən azyaşlıların üzərindən pul qazanılmasına nəzarət olunurmu:
Bizim.Media bununla bağlı Ailə Qadın və Uşaq Problemləri üzrə Dövlət Komitəsinə sorğu ünvanlayıb. Komitənin mətbuat katibi Teymur Mərdanoğlu sorğumuza cavab olaraq bildirib ki, dövlət bütün vətəndaşların, eləcə də azyaşlıların və yetkinlik yaşına çatmayanların hüquqlarını qoruyur:
“Qeyd edim ki, Dövlət Komitəsi tərəfindən azyaşlıların və yetkinlik yaşına çatmayanların hüquqlarının qorunması ilə bağlı mütəmadi olaraq maarifləndirici görüşlər və tədbirlər keçirilir. Eyni zamanda, sosial şəbəkələrdə azyaşlı və yetkinlik yaşına çatmayan vətəndaşlarımızın zorakılığa məruz qalması ilə bağlı yayılmış istənilən görüntülər aidiyyəti qurumlarla birgə araşdırılır və buna hüquqi qiymət verilir.
Sosial şəbəkələrə gəlincə, istifadəçilər bu platformalar vasitəsilə cəmiyyət üçün daha faydalı işlər görə və layihələr icra edə bilərlər. Reytinq xətrinə azyaşlılardan və yetkinlik yaşına çatmayanlardan sui-istifadə etmək, onların hüquqlarının pozulmasına gətirib çıxarılması yolverilməzdir. Düşünürəm ki, bu məsələdə valideynlər də məsuliyyətli olmalıdırlar”.
Bəs, azyaşlılardan “TikTok”da qazanc üçün istifadə edənlərlə bağlı hansısa cəza nəzərdə tutulubmu?
Hüqüqsünas Zaur Quliyev təəssüflə qeyd edib ki, günümüzdə boşanmaların sayının artması ailə institunun zəifləməsinə gətirib çıxarır:
“Bu da yekunda uşaqların diqqətdən kənar, nəzarətsiz qalması ilə nəticələnir ki, uşaqlar daha çox öz yaşıdlarına yox, yaşlarından böyüklərin həyat tərzinə maraq göstərirlər. Ailə institunun zəifləməsi qadınlarda da, kişilərdə də sosial şəbəkəyə marağı artırır. Bunun nəticəsində uşaqlar da sosial şəbəkəyə maraq göstərirlər.
Bu tip hallara yol verən, bu tip paylaşımları izləyən, paylaşan, o uşaqlara şirnikləndirici hədiyyələr atan şəxslər də valideyinlərlə yanaşı qanun qarşısında olmasa da, cəmiyyət qarşısında məsuliyyət daşıyırlar.
Qanunvericiliyə müvafiq olaraq uşaqların qeydiyyatda olduğu və ya yaşadığı ərazi üzrə yerli icra hakimiyyətinin qəyyumluq himayəçilik komissiyaları bu qəbildən olan işlərdə tam səlahiyyətlidirlər. Belə ki, sözügedən komissiyalar bu cür ailələrin müəyyən olunması və uşaqların hüquqlarının pozulduğu halları aşkar etmək, lazım gəldikdə onların bu tip ailələrdən təcrid olunması üçün müvafiq addımlar atmaq, bilavasitə məhkəməyə müraciət edib, valideynlik hüququndan məhrum etmək səlahiyyətinə malikdirlər.
Qanunvericilikdə uşaqların sosial şəbəkədə hesab açması ilə bağlı qadağa yoxdur. Nə inzibati, nə cinayət qanunvericiliyində bununla bağlı hər hansı bir cərimə, yaxud da cəza nəzərdə tutulmayıb.
Ümid edirəm, gələcəkdə belə bir norma tətbiq olunacaq. Lakin həm “Uşaq hüquqları haqqında” Azərbaycan Respublikasının qanunu, həm “Uşaq hüquqları haqqında” beynəlxalq konvensiya, eyni zamanda Ailə Məcəlləsi və Konstitusiyamızda da qeyd olunub ki, uşaq dövlətin himayəsindədir.
Valideynlər də uşağın təlim-tərbiyəsinə, təhsilinə, səhhətinə, psixologiyasına mənfi təsir göstərəcək hallara yol verməməli və uşaqları bu kimi hallardan uzaq tutmağa çalışmalıdırlar. Buna əməl etməyən valideynlər, valideynlik hüququndan məhrum edilə bilər”.
Bizim.Media
