Zaqatalanın 51 məzunu xarici ölkələrdə təhsil alacaq

Bu il ali məktəblərə Zaqatala rayonundan qəbul olunan 337 nəfər ölkəmizin ali təhsil müəssisələrində, 51 məzun isə xarici ölkələrdə oxuyacaq.

Bu barədə Bizim.Media-nın yerli bürosuna Zaqatala rayonu üzrə Təhsil sektorundan məlumat verilib. 

Bildirilib ki, bu il sənəd verən 454 məzundan 381 nəfəri tələbə adını qazanıb. Eyni zamanda, əvvəlki illərin məzunlarından 7 nəfər də ali məktəblərə daxil olub. 

Diqqətə çatdırılıb ki, qəbul imtahanlarında məzunlardan 42 nəfəri 500-700 bal arasında, o cümlədən 16 nəfər 600 baldan yuxarı nəticə göstərib. Bəhmətli kənd tam orta məktəbin məzunu Leyla Muradova imtahanlarda rayon üzrə hamıdan çox – 662 bal toplayaraq Bakı Ali Neft Məktəbinin kimya mühəndisliyi fakültəsinə qəbul olunub. 
Ümumiyyətlə, qəbul imtahanlarında akademik Zərifə Əliyeva adına Texniki fənlər təmayüllü liseyin, Humanitar fənlər gimnaziyasının, şəhər 3 nömrəli, həmçinin Aşağı Tala, Yuxarı Tala, Muxax, Danaçı kənd tam orta məktəblərin məzunları daha yüksək nəticələr əldə ediblər.

Tural Rasim oğlu, Bizim.Media, Şimal-Qərb bürosu