Nazim Nağıyev: “Ramil Usubov məni yola salanda dedi ki...”

Bir zamanların ən məhşur personalarından olan və müxalifətin mitinqlərinin dağıdılmasında özünəməxsus xidmətlər göstərən keçmiş polis rəisi Nazim Nağıyev Moderator.az-a geniş müsahibə verib. Onunla söhbətin ikinci hissəsini oxuculara təqdim edirik:

Əvvəli...moderator.az/?xeber=48363

-O vaxt deyəsən, naziriniz Vaqif Novruzovla yola getməmisiniz və sizi qəbuluna çağırıb nəsə təklif edib...

-Vaqif Novruzov Nərimanov rayonunda işləyəndə mən də Bakı Şəhər Baş Polis idarəsində işləyirdim və bir-birimizi tanıyırdıq, mənə də münasibəti yaxşı idi. Amma bir gün Baş Cinayət Axtarış İdarəsinin rəisi Zakir Nəsirov mənə dedi ki, səni nazir çağıracaq, amma hazır ol, deyəsən səndən nədəsə narazıdır. Hətta dedi ki, yəqin Əli müəllim (Əli Nağıyev-red.) onun haqqında prezidentə nəsə deyib. Heç üstündən bir gün keçməmiş məni nazirin qəbuluna çağırdılar. Nazirin kabinetinə daxi olan kimi mənə qayıtdı ki, bəs sənin qardaşın məndən nə istəyir? Dedim mən başa düşmədim, məndən niyə soruşursunuz bunu? Qardaşım partiya işindədir və YAP üzrə Heydər Əliyevin müavinidir. Əgər qardaşım barənizdə nəsə deyibsə zəng edin özündən soruşun, məndən niyə soruşursunuz? Dedim onun başı elə qarışıq olur ki, günlərlə üzün görmürəm və sizinlə bağlı da mənə bir kəlmə də deməyib. Qayıtdı ki, ona zəng etmirəm, amma biləsən ki, prezidentə mənim haqqımda deyib. Bildirdim ki, mən bir rayonun polis rəisiyəm, ancaq Əli Nağıyev YAP sədrinin müavini kimi bütün respublikadan məlumatlar alır, onun informasiyaları məndən min dəfə çoxdur, ola bilsin ki, hardansa bununla bağlı məlumat və ya siqnal gəlib. Mənə qayıtdı ki, bəlkə sən bir vəzifə istəyirsən, mən bilim. Cavab verdim ki, heç bir vəzifə istəmirəm, işimdən narazılığım yoxdur, rəislərim də həmişə işimdən razı qalıb. Söhbətin sonunda yumşaldı və bir daha soruşdu ki, bəlkə nədənsə narazısan? Bildirdim ki, cənab nazir, özüm üçün narazı deyiləm, amma bu nazirlikdə AXC iqtidarı dövründə olduğu vəziyyət davam edir. Yəni haqsızlıq da var, vəzifələr də alınıb-satılır. Bunu deyəndə yenidən əsəbləşdi və məndən fakt istədi. Dedim ki, burda kadrlar idarəsində Səfər Əliyev adlı bir nəfər var, bunu Naxçıvanlı olduğuna görə işdən çıxarırlar. Dərhal knopkanı basdı və Çingiz Hidayətzadədən Səfərin vəzifəsin soruşdu. Dedi o Səfər nə vəzifədədədir, Çingiz də cavab verdi ki, inspektordur. Nazir dedi ki, yaxşı, bu gündən olsun baş inspektor. Yəni aramızda belə bir söhbət oldu. Sonradan Səfər mənə dedi ki, elə mən baş inspektor idim, nazirin xəbəri yoxdu. Çingiz Hidayətzadə də onu çağırıb ki, səni kimsə nazirə tapşırıb, mən səni baş inspektor təyin etmək istədim, baxdım ki, elə baş inspektorsan. Səfərdən xahiş edib ki, sən Allah, səndən soruşan olsa de ki, mənə baş inspektor vəzifəsini elə indi veriblər. Səfərlə də aram yaxşı idi, Səfərə də dedim ki, səni nazirə mən tapşırmışdım. Mən nazirlə söhbətdən sonra öyrəndim ki, Əli müəllim ovcunda olan məlumatlarla bağlı prezidentə məruzə edibmiş. Əli Nağıyev elə bir adamdır ki, kimsəyə güzəşt etməz, özü də Heydər Əliyev kimi bir adama informasiyanı olduğu kimi və vaxtında deməliydi. O heç vaxt düşünməzdi ki, qardaşım filan yerdə işləyir deyə bunu deməyim.

-Bəs Ramil Usubovla necə, polemikalarınız olubmu?

-Açığı deyim ki, Ramil Usubov başqa rəislərə necə tələbkarlıqla yanaşıbsa, həmişə mənə qarşı da tələbkar davranıb, ancaq hörmət-izzətlə. Deyim ki, işlərimiz həmişə yaxşı gedib. Elə bir məqam olmayıb ki, nazir məndən nədəsə narazı qalsın və ya hansısa addımımı tənqid eləsin, yaxud qəzəblənsin. Ramil müəllim hətta bir neçə dəfə Səbail Rayon Polis İdərəsinin işini başqa rəislərə nümunə də çəkib. Özü də deyim ki, obyektiv olaraq nümunə çəkib. Məsələn, kadrların seçilməsi, bizim idarədə olan nizam-intizam məsələsində çox öndə olmuşuq. Elə olmayıb ki, Ramil Usubov məni bir dəqiqədən artıq axtarsın və tapa bilməsin. Nə vaxt axtarıb, məni iş yerində tapıb. Bunu da həmişə qeyd edib.

-Əgər nazirin yanında bu cür nüfuz qazanmışdınızsa niyə Səbaildən Binəqədiyə köçürüldünüz? Hansı ki, mətbuat bunu hətta sürgün kimi qələmə verdi...

-Səbail də Bakının 11 rayonundan biri idi və Binəqədi də çox çətin, ağır bir rayon idi. Orada da əməliyyat şəraiti gərgin idi. Binəqədi ərazi və əhali baxımından da Səbaildən bir neçə dəfə çox idi. Ona görə də siz jurnalistlərdən fərqli olaraq bunda mənfi bir şey görmədim. Heç indi də belə fikirləşmirəm. Binəqədidə də kifayət qədər yüksək səviyyədə işlədim, bir çox məzmunlu elə tədbirlər gördük ki, nazir tərəfindən qiymətləndirildi. Sonra da vaxt gəlib çatanda ki, təqaüdə getməliydim, özüm ərizəmi yazdım ki, təqaüdə göndərin.

-Gəlin etiraf edək ki, o vaxtlar təqaüd yaşı çatmış onlarla polis rəisi də vardı və bu gün də var. Amma Sizin təqaüdə getməyiniz labüd oldu nədənsə...

-Mənim də müddətimi iki dəfə artırdılar. Bilirsiniz, elə ki, yaş gəlib çatır və hər dəfə müddətini bir il artırmaq lazım gəlirdi, ona görə də açığı, bu heç o qədər də maraq doğurmurdu. Yəni raport yazırsan, bir də görürsən ki, bir il gəlib çatdı, təzədən bir də yazmağa məcbur olursan. Ona görə də getməyə qərar verdim.

-Təqaüdə göndəriləndə heç olmasa Ramil Usubov sizi qəbul etdimi?

-Raportum əsasında məni nazirliyə dəvət elədilər, nazirin kabinetində nazir və nazir müavinlərinin iştirakıyla xidmətdə fərqlənməyə görə bir “qramota” da verdilər, hətta bir yerdə xeyli söhbət elədik və şəkil də çəkdirdik.

-Nazirlə?

-Nazirlə də, müavinləriylə də. Yəni deməyim odur ki, təntənəli surətdə bir mükafat da verib məni təqaüdə göndərdilər. Ramil Usubov məni yola salanda da dedi ki, nə vaxt istəsən yanıma gələ, müraciət edə bilərsən.

-Sonradan elə olub ki, nazirə işiniz düşə?

-Bir-iki dəfə tədbirlərdə mehribancasına görüşmüşük. Amma zərurət olmayıb ki, ona nəyə görəsə müraciət edəm, yaxud da nəyisə xahiş edəm.

-Sizi jurnalistlər və cəmiyyətin küçə-meydana çıxmağa cəsarət edən təbəqəsi müxalifətin mitinqini dağıdan irikalibrli toplardan biri hesab edirdi. Amma deyəsən Binəqədiyə gedəndən sonra müxalifət də xiffətinizi çəkdiyindən meydanlara çıxmaqdan az qala imtina etdi...

Ardı var...