Bu gün Pakistanda, Diamer bölgəsinin Çilas şəhərində helikopter qəzaya uğrayıb.
Bizim.Media xəbər verir ki, bu barədə rəsmi şəxslər məlumat yayıb.
Hadisə nəticəsində heyət üzvlərindən ibarət 5 nəfər həyatını itirib. Helikopterdə 2 pilot və 3 texniki işçi olub.
Rəsmi şəxslərdən biri dawn.com-a açıqlamasında helikopterin Pakistan Ordusuna məxsus olduğunu bildirib. Helikopter yeni təklif olunan helipad üzərində sınaq enişi həyata keçirərkən qəzaya uğrayıb. Hadisə yerinə polis və xilasedici dəstələr cəlb olunub, təxliyə işlərinə başlanılıb.
Qəzanın səbəbi hələ dəqiqləşdirilməsə də, ilkin ehtimallara görə bunun “texniki nasazlıq” səbəbindən baş verdiyi deyilir.
Xatırladaq ki, bu ayın əvvəlində Xayber Paxtunxva əyalətinin Bajaur bölgəsində də bir xilasetmə helikopteri qəzaya uğramış, nəticədə 2 pilot və 3 ekipaj üzvü həlak olmuşdu. Həmin helikopter daşqından zərər çəkmiş əraziyə yardım çatdırmaq üçün göndərilmişdi.
2024-cü ildə isə Şeva neft yatağı yaxınlığında, Şimali Vəziristanda bir neft şirkətinə məxsus helikopterin qəzaya uğraması nəticəsində azı 6 nəfər həlak olmuş, 8 nəfər isə ağır yaralanmışdı.
Bizim.Media
