Futbol üzrə Ukrayna milli komandası Avropa çempionatında dörddəbir final mərhələsinə yüksəlib.
Bizim.Media xəbər verir ki, iyunun 29-da Şotlandiyanın Qlazqo şəhərindəki “Hampden Park” Arenada İsveç və Ukrayna yığmaları üz-üzə gəliblər.
İtaliyalı baş hakim Daniele Orsatonun idarə etdiyi oyunda hesabı Ukrayna millisi açıb. Matçın 27-ci dəqiqəsində Aleksandr Zinçenko fərqlənib. Matçın 43-cü dəqiqəsində isveçli futbolçu Emil Forsberq hesabı bərabərləşdirib. Qarşılaşmanın ilk hissəsi 1:1 hesabı ilə yekunlaşıb.
MÖVZU İLƏ BAĞLI:
İsveçrə millisi dünya çempionunu məğlub etdi - Dörddəbir finala yüksəldi
Komandaların cəhdlərinə baxmayaraq ikinci hissədə qapılara top vurulmayıb. Görüşün əsas vaxtı 1:1 hesablı heç-heçə ilə yekunlaşıb.
Qalibi müəyyənləşdirmək üçün hər biri 15 dəqiqəlik iki hissədən ibarət əlavə vaxt oynanılıb. Matçın 99-cu dəqiqəsində kobud oyuna görə baş hakim Markus Danielsona qırmızı vərəqə göstərib və İsveç millisi azlıqda qalıb. Bundan yararlanan Ukrayna millisi istəyinə 121-ci dəqiqədə çatıb.
Futbolçu Artyom Dobvik Ukrayna millisinin qələbə qolunu vurub - 2:1. Komanda ilk dəfə Avropa çempionatının dörddəbir final mərhələsinə yüksəlib.
Ukrayna millisi dörddəbir finalda İngiltərə yığması ilə qarşılaşacaq. Matç iyulun 3-də İtaliyanın paytaxtı Romadakı Olimpiya Stadionunda təşkil olunacaq.
Beləliklə, dörddəbir final mərhələsinin bütün cütlükləri müəyyənləşib. İyulun 2-də Sankt-Peterburqda İsveçrə-İspaniya, Münxendə Belçika-İtaliya, ertəsi gün Bakıda Çexiya-Danimarka, Romada Ukrayna-İngiltərə matçları baş tutacaq.
Bizim.Media
