Azərbaycan Dövlət Pedaqoji Universiteti sosial şəbəkələrdə yeməkxana ilə bağlı yayılan görüntülərə münasibət bildirib.
Bizim.Media xəbər verir ki, ADPU-dan “oxu.az”a bildirilib ki, universitetin professor-müəllim və tələbə heyətindən dəfələrlə şikayət daxil olub ki, hər hansı qida qəbul etmədikləri halda yeməkxanadakı yerləri həddən artıq məşğul edən tələbələr var və buna görə də digər müəllim və tələbələr yeməkxanadan istifadə edə bilmirlər:
“Sözügedən videodakı səlahiyyətli şəxs isə universitetin İnzibati Departamentinin müdiridir və universitetin infrastrukturu ilə bağlı şikayət və təkliflər həmin struktura yönləndirilir.
Mövcud vəziyyətlə bağlı bir neçə gün ərzində yeməkxanadakı həmin tələbələrlə söhbətlər aparılıb. Lakin təəssüf ki, eyni tələbələrə bu məsələ dəfələrlə izah edilsə də, bəziləri bunu anlayışla qarşılamayıb və tövsiyələrə məhəl qoymayıb”.
“Digər tərəfdən bildirmək istəyirik ki, Pedaqoji Universitetin yeni istifadəyə verilmiş Kitabxana-İnformasiya Mərkəzi və əlavə geniş oxu zalında tələbələrimizin oxumaq, tapşırıqlar işləmək, internetdən istifadə etmək və elektron kitabxanaya daxil olmaq üçün bütün şəraitlər mövcuddur. Kitabxana-İnformasiya Mərkəzində ümumi oxu zalından əlavə hermetik arakəsmələrlə ayrılan və səskeçirməyən bir neçə müzakirə otaqları da var. Hansı ki, bu otaqlarda təkcə kitab oxumaq deyil, internetə qoşulmaq, təqdimatlar etmək üçün də hər bir şərait var və burada bir neçə tələbə rahatlıqla müzakirə apara bilər. Eyni zamanda Kitabxana-İnformasiya Mərkəzində tələbələrin rahatlıqla çay-kofe və qəlyanaltı ala və müzakirələr apara biləcəkləri minikafe də fəaliyyət göstərir.
Bu səbəbdən də tövsiyə olunur ki, tələbələr bu məqsədlə yeməkxanadan yox, oxu zalından və ya müzakirə otaqlarından istifadə etsinlər. Həmçinin, nəzərə almaq lazımdır ki, yeməkxanadakı səs-küydə dərs oxumaq demək olar ki, mümkünsüzdür və tələbələrin bu məqsədlə digər imkanlardan istifadə etməsi daha məqbuldur”, - deyə qeyd edilib.
Qeyd edək ki, Azərbaycan Dövlət Pedaqoji Universitetinin (ADPU) əməkdaşının tələbələrə bufetdə dərs oxumağı qadağan etməsi barədə məlumat yayılıb.
Bildirilib ki, ADPU-nun əsas korpusunda üç gündür ki, bu adam bufetə girib qabağında kitab olan bütün tələbələri qovur. Səbəb də onu gətirir ki, bufetdə oturmağa yer yoxdur.
İddia edilib ki, kitab bağlı olsa belə, stolda kitab görsə, sərt formada zaldan qovmağa çalışır, bu hərəkəti xüsusilə qızlara qarşı edir.
Bizim.Media
