Mədəniyyət naziri Tamara Sinyavskayaya “Şərəf” ordenini TƏQDİM ETDİ

Azərbaycan Prezidenti tərəfindən “Şərəf” ordeni ilə təltif edilən SSRİ Xalq artisti Tamara Sinyavskayaya orden təqdim olunub.

Mədəniyyət Nazirliyindən Bizim.Media-ya verilən məlumata görə, bu gün mədəniyyət naziri Anar Kərimov böyük sənətkar, vokal sənətinin unudulmaz səsi Tamara Sinyavskayaya ordeni təqdim edib.

Nazir görkəmli opera müğənnisinə gələcək işlərində uğurlar və möhkəm cansağlığı arzulayıb.

Dünya şöhrətli opera və estrada müğənnisi, bəstəkar, SSRİ Xalq artisti Müslüm Maqomayevin həyat yoldaşı Tamara Sinyavskaya fəaliyyətinin daim diqqətdə saxlanılması və yüksək qiymətləndirilməsinə görə ölkə başçısına dərin təşəkkürünü bildirib.
Sonda böyük sənətkarla xatirə şəkli çəkilib.

Qeyd edək ki, Azərbaycan Respublikası Prezidenti 5 iyul 2018-ci il tarixində Rusiya-Azərbaycan mədəni əlaqələrinin möhkəmləndirilməsində uzunmüddətli səmərəli fəaliyyətinə görə SSRİ Xalq artisti Tamara Sinyavskayanın “Şərəf” ordeni ilə təltif edilməsi haqqında sərəncam imzalayıb.

Bizim.Media