Əlibaba Məmmədov dəfn olundu

Xalq artisti Əlibaba Məmmədov dəfn olunub. 

Bizim.Media xəbər verir ki, mərhum birinci Fəxri xiyabanda torpağa tapşırılıb. 

Dəfn mərasimində mərhumun ailə üzvləri, yaxınları və sənət yoldaşları ilə yanaşı mədəniyyət nazir Anar Kərimov, eləcə də ictimaiyyət nümayəndələri iştirak edib. 

Azərbaycan Prezidenti İlham Əliyev və Birinci vitse-prezident Mehriban Əliyeva dəfn mərasiminə əklil göndərib. 

Qeyd edək ki, Ə.Məmmədov 5 fevral 1930-cu ildə Bakının Maştağa kəndində anadan olub. Onun xanəndə kimi yetişməsində Bakının və Abşeron kəndlərinin özünəməxsus muğam mühiti böyük rol oynayıb. 

Ə.Məmmədov musiqi təhsilini 1953-1958-ci illərdə Azərbaycan Dövlət Musiqi Məktəbində xanəndə Seyid Şuşinskinin sinfində alıb. 1945-ci ildən Azərbaycan Dövlət Filarmoniyasının solisti, 1978-1988-ci illərdə “Azkonsert birliyi”nin solisti olub. 
O, 100-dən artıq mahnı və təsniflər yaradıb ki, onlar xanəndələrin repertuarlarına daxil edilib. 

Xanəndənin xidməti dövlətimiz tərəfindən yüksək dəyərləndirilib. O, Azərbaycan SSR Əməkdar artisti (18 may 1963), Azərbaycan SSR Xalq artisti (17 may 1989) fəxri adları, "Şöhrət" ordeni (4 fevral 2000), "Qızıl çinar" beynəlxalq mükafatı (10 may 2009"), "İstiqlal" ordeni (3 fevral 2010), "Şərəf" ordeni (4 fevral 2020) mükafatlarına layiq görülüb. 

Ə.Məmmədov fevralın 25-də 92 yaşında vəfat edib. 

Bizim.Media