Əməkdar artist Mətanət İsgəndərlinin oğlu Kərim keçmiş həyat yoldaşı Canananın onun xanımının oğlu Tuncayı evə buraxmaması ilə bağlı iddialarına ilk dəfə cavab verib.
Bizim.Media xəbər verir ki, “İncə səhər” verilişinə müsahibə verən Kərim Canananın yalan danışdığını və bu hadisədən özünə reklam qazandığını bildirib.
“Yeni oğlum dünyaya gəlib, istəyirəm ki, onun digər 3 övladımla münasibətləri sıx və mehriban olsun. Dörd uşaq, həyat yoldaşım, ev, məktəb, təhsil problemi, çatdıra bilmirəm. Uşaqlarımın anası isə özünü reklamla məşğuldur. Utanmır, 14 yaşlı oğlunu çəkib videosunu yayır. Mənim yoxluğumdan istifadə edib, evdən çıxan kimi gəlib bu hərəkəti edib. Həyat yoldaşım zəng etdi ki, gəlib deyir, qapını açın. Hələ Tuncay məktəbdən gəlməmişdi. Əvvəl Mətanət İsgəndərlinin evində qalanda yarım və bir saat əvvəldən zəng vururdun ki, uşaqlar hazırlaşsın, gəlirəm. İndi nə oldu? Mən təzə evə köçmüşəm, sənin gözün götürmədi məni?”
Kərim vurğulayıb ki, Canana bu olayı qəsdən edib ki, onun xanımının görüntülərini çəkib, sosial şəbəkədə yaysın:
“Xalama dedim ki, qapını açma, özüm qalxıram. Xalam da deyib ki, Tuncay, ananı yola sal, gəl. Mənim xanımım onu görmək məcburiyyətində deyil. Hansı qadın buna dözər. O gözləyir ki, qapı açılsın, əlində kamera çəksin. Niyə mənim həyat yoldaşımı çəkib sosial şəbəkədə yaymalısan? Mən gələndə çıxıb getmişdi”.
Mətanətin oğlu keçmiş xanımının söylədiyi kimi övladı Tuncayla əlbəyaxa dava etmədiyini, sadəcə bu hadisəyə görə onu tənbeh etdiyini bildirib:
“Tuncaya əsəbiləşdim ki, yekə oğlansan, qapını təpiklə vurmaq nədir? Belə mədəniyyət görmüsən? Uşaq anasına əsəbiləşib ki, məni çəkmə. Yalandan deyir ki, Tuncayla əlbəyaxa olmuşuq”.
Kərim bildirib ki, bir müddətlik uşaqlarına anası ilə görüşməyə qadağa qoyacaq:
“Məcburam, uşaqlara qadağa qoyum ki, onunla görüşməsin. Nəslində heç kimlə münasibəti yoxdur. Qardaşına demişəm, amma münasibətləri yoxdur. Nəsillərinin ağsaqqalı var, dəfələrlə onlara demişəm. Necə ki, ailəsi dağılanda öz ağsaqallarına məhəl qoymadı, indi də elə. O, öz bildiyini edir. And içirəm ki, onu övlad düşündürmür”.
Qeyd edək ki, M.İsgəndərlinin oğlu Kərim və Canana 2021-ci ilin oktyabr ayında rəsmi olaraq boşanıblar. 3 övlad anadan alınaraq, ataya verilmişdi. Canana daha sonra Apellyasiya Məhkəməsinə müraciət edərək övladlarının qəyyumluğunu ataları Kərimdən alıb. Uşaqlar hazırda M.İsgəndərli ilə birlikdə yaşayır. Kərim isə ikinci dəfə ailə qurub və bir övladı var.
Rəşad Əliyev, Bizim.Media
