Xalq artisti Brilliant Dadaşova növbəti açıqlaması ilə adından söz etdirib:
Bizim.Media xəbər verir ki, sənətçi qonaq olduğu “Göstərir radio” verilişində həyat yoldaşı Səməd Vurğun adına Akademik Rus Dram Teatrının direktoru Ədalət Hacıyevlə ailə qurmasının 35 ili tamam olduğunu bildirib.
Proqramın aparıcısı Elnarə Təhməzovanın “Övlad, qadın, həyat yoldaşı, ana və sənətkar - bu sadalananların içində xoşbəxtlik daha çox hansındadır?” sualına Brilliantın cavabı belə olub:
“Bu ay evliliyimizin 35 illiyi tamam olur. Alla Puqaçovanın çox gözəl sözü var: Bizim bəxtimiz bizə verilən bir kitabdır. Deyirlər ki, vərəqləri yazılıb. Amma orada boş səhifələr də var. Hansı ki, biz o səhifələrə əlavələr edə bilərik və yazarıq”.
Müğənni, həmçinin subay xanımların ailə qurarkən diqqətli olmağa səsləyib:
“Biz özümüz ətrafımızı seçə bilərik. Qohumlarımızı deyil, həyat yoldaşımızı özümüz seçə bilərik. Ona görə qızlarımıza hər zaman deyirəm ki, düzgün həyat yoldaşı seçin. Onlar düzgün həyat yoldaşı seçməyəndə deyirəm ki, lazım deyil evdə oturun. İş o deyil ki, sizin ailəniz olsun. Mentalitet uşaqlarımızı məhv etdi. Mütləq ailə olsun, qızlar kimə gəldi ərə getsin. Onlara söyləyirəm ki, belə etməyin. Özüm, ailəm, qohumlarım, ətrafım salamatdırlarsa, mən xoşbəxtəm”.
Rəşad Əliyev, Bizim.Media
