Bu gün cəmiyyətdə geniş müzakirə olunan məsələlərdən biri də Beynəlxalq Bankdan kredit alan iş adamlarının, sahibkarların kütləvi həbs edilməsidir. Sizi bilmirəm, şəxsən mən bunu bəyənirəm. Bəyənirəm demək hələ azdır, mən bunu lap alqışlayıram. Məgər onlar hələ də başa düşmürdülər ki, bu bankın yiyəsi var və onun pulunu götürüb sağa - sola xərcləmək olmaz? Bəlkə onlar elə bilirdilər millətin 95 faizini boğan bu şoğərib krediti onlara kef üçün verirdilər? Xeyr, bir daha xeyr. Bax belə yerdə deyirlər ki, pulu olanın ağlı olmaz. Nə olsun pul qazanmağı bacarırlar, xərcləməyi, daha doğrusu, saray vergisini ki, vaxtında verməyi bacarmırlar. Yəqin onlar fikirləşiblər ki, mirasa qalmış krediti alanda baş sahibkar-baş bankir, Mərkəzi Bankın əvəzolunmaz prezidenti Elman əkə tərəfindən qoyulmuş taksanı, ”x9dşapka”x9dnı-20 faizi verəndən sonra nə istəsələr edə bilərlər. Amma onlar qanmırdılar ki, bununla iş bitmir. O krediti götürüb hər ay faizini ödəmək öz yerində, qazancı da qəpiyinə qədər vermək lazım idi axı. Daha yaxşı olardı ki, əvvəllər dərisi boğazından çıxarılmış həmkarlarından ibrət götürüb hops- topla qamarlanıb içəri atılan sahibkarlar krediti alan kimi onu ümumi "katyol"a ötürəydi, onda işləri daha “xod“ gedərdi. Bununla belə, ömrü boyu bu hakimiyyət tərəfindən tasa oturulmuş, soğan kimi soyulmuş, dərdini heç kəsə deyə bilməyən- içi özünü, çölü özgəsini yandıran sahibkarkarı, onların qohum əqrəbalarını arxayın edirəm ki, narahat olmasınlar, papaqlarını köndələn qoysunlar, ürəklərini buz kimi saxlasınlar. Puldan ötrü sinov gedən bu hakimiyyəti həmişə yemləyən iş adamlarını heç də siyasi məhbuslar kimi şərləyib uzun müddət içəridə saxlamayacaqlar. Sadəcə onların bütün var- yoxlarını, qızıllarını, daşınar və daşınmaz əmlaklarını, xaricdəki pullarını, bir sözlə, hər şeylərini əllərindən alıb onları xoruza yük edəcək, sonra da dinməzcə buraxacaqlar.
Əlbəttə, necə deyərlər, imam üçün ağlayanda yezid üçün də ağlamaq lazımdır. Əgər onlar bunu qanmırdılarsa gərək Beynəlxalq Bankın baş cibgiri Cahangir əkə onları başa salaydı. Söhbət o Hacıyevdən gedir ki, bu hakimiyyət cəmiyyət qarşısında, millət qarşısında rüsvay olmaq hesabına da olsa onun həyat yoldaşını dünya malına-pula görə oğurlayan bandanı tutmağa məcbur olmuşdu. Yoxsa banda ilə nə işləri var idi ki? Uzun illər dövlət strukturunda maskalanmış bu banda gül kimi fəaliyyət göstərir, sifarışlə insanları oğurlayıb bir göz qırpımında torbasını tikirdilər. Cahanir əkəni də vəzifədə otuzduranlar bu yardımı ona görə etməmişdilər ki, o, yaxşı mütəxəssisdir, 20 ildir Beynəlxalq Bankda külüng çalır, tər tökür. Bunu ona görə etmişdilər ki, onu özlərinə hamıdan yaxın, sədaqətli bilmişdilər. Gərək Cahangir əkə bu yaxşılığı ömrü boyu unutmayaydı və gecə - gündüz onlara təmənnasız xidmət göstərəydi. Axı onun da həyat yoldaşının taleyi oğurlanmış Milli Təhlükəsizlik Nazirliyinin mayoru Mahir Abdullayevin, təmiz qələminə görə qapısında qanına qəltən etdirilən jurnalist Elmar Hüseynovun, ölkənin rəhbərliyinin ünvanına sərt tənqidi fikirlər səsləndirən, dilini dinc qoymadığına görə ağzından güllələnən akademik Ziya Bunyadovun, yüzlərlə insanların taleyi kimi ola bilərdi.
Ona görə də elə bilirəm siz də mənimlə razılaşarsınız ki, sadəcə işdən çıxarılmaqla C. Hacıyev canını qurtara bilməz, günahını heç cür yuya bilməz, mərhəmət qazana bilməz. Onun cəzası daha ağır olmalıdır, ən azından Şimali Koreyanın müdafiə nazirinə verilən cəza kimi. C.Hacıyev ona bəslənilən etimadı axıra qədər şərəflə doğrultmadığına, əmanətə xəyanət etdiyinə görə Bakının ən görkəmli yerində topun qabağına qoyulmalı, prezident Aparatından açılan yaylım atəşi ilə parça-parça edilməlidir ki, tikəsi ələ də gəlməsin.
Beləliklə də tətbiq ediləcək bu ağır, ağır olduğu qədər də ədalətli cəza gələcəkdə ağasına qarşı nankorluq edəcək başqalarına da bir dərs olardı...
Mətləb Mütəllimli
