“Azərbaycandan ərzaq məhsullarının tədarükünü artırdıq” – Rusiya Baş nazirinin müavini

Rusiya Azərbaycandan ərzaq məhsullarının tədarükünü artırır.

Bizim.Media "RİA Novosti" agentliyinə istinadən xəbər verir ki, bu barədə Rusiya Federasiyası Baş nazirinin müavini Viktoriya Abramçenko bildirib.

Nazirlər Kabinetinin Mətbuat xidmətinin yaydığı bəyanata görə, Rusiya özünü əsas ərzaq malları ilə təmin edir və bazarın müxtəlif ərzaq məhsulları ilə zənginliyini, eləcə də rusiyalı tələbatçı üçün çeşidin artırılması məqsədilə idxal tədarükünü genişləndirir.

“Ehtiyat üçün alış-veriş etməklə süni tələbat yaratmaq lazım deyil. Xarici iqtisadi təzyiq şəraitində qıtlıq riski və ya çeşidin azalması üçün heç bir zəmin yoxdur. Biz bazarı yenidən səmtləşdirərək qarşılıqlı ticarəti nizamlayacaq, dost ölkələrlə tərəfdaşlıq şəbəkəsini genişləndirəcəyik”, deyə Abramçenko qeyd edib.

Baş nazirinin müavini xatırladıb ki, son ay yarım ərzində “Rosselxoznadzor” 140-dan çox xarici müəssisədən, o cümlədən Azərbaycan, Türkiyə, Hindistan, Çin, Belarus Respublikası, Qırğızıstan və Qazaxıstandan ərzaq məhsullarının Rusiyaya gətirilməsinə icazə verib.

Bizim.Media