Yaşıl enerji sahəsində YENİ ERA – “Noyabrda daha böyük nailiyyətlərə imza atacağıq”

Xəbər verdiyimiz kimi, iyunun 4-də Bakı Enerji Həftəsi açılıb. İyunun 6-dək davam edəcək Bakı Enerji Həftəsi 27-ci Beynəlxalq Xəzər Neft və Qaz, 10-cu Yubiley Xəzər Beynəlxalq Energetika və Bərpa Olunan Enerji sərgilərini və əvvəllər Xəzər Neft və Qaz Konfransı adı ilə tanınan Bakı Enerji Forumu kimi üç ayrı layihəni ehtiva edir.

Forumda 30 müxtəlif ölkəni təmsil edən 249 şirkət iştirak edir.

İyunun 4-də həftə çərçivəsində Azərbaycan Prezidenti İlham Əliyev və Birləşmiş Ərəb Əmirliklərinin sənaye və qabaqcıl texnologiyalar naziri Sultan Əhməd Əl Cabir Neftçala, Biləsuvar Günəş elektrik stansiyalarının və Abşeron-Qaradağ Külək Elektrik Stansiyasının təməlini qoyub.

Bu addım onu göstərir ki, Bakı Enerji Həftəsi ilə Azərbaycanda bərpa olunan enerji sahəsində yeni eranın təməli qoyulur.

Mövzu ilə bağlı Bizim.Media-ya açıqlamasında Milli Məclisin deputatı Elman Nəsirov Bakı Enerji Həftəsini COP29-un baş məşqi kimi dəyərləndirib:

“Bakı Enerji Həftəsinin əhəmiyyətinə bir neçə parametr üzrə qiymət vermək lazımdır. Xəzər Neft-Qaz Sərgisinin 30 illiyi tamam olur. 30 il bundan öncə ilk dəfə belə bir beynəlxalq tədbir keçirdik. “Əsrin müqaviləsi”nin imzalanmasında da bu tədbirin mühüm əhəmiyyəti oldu.

Amma indiyə qədərki tədbirlərlə Bakı Enerji Həftəsi çərçivəsində keçirilən başqa bir tədbirin də fərqinə varmaq lazımdır. İndiyə kimi belə tədbirlər çərçivəsində dünyaya Azərbaycanın yalnız neft-qaz potensialı nümayiş etdirilirdi. Lakin bu dəfə təkcə neft-qaz deyil, həm də ölkəmizin yaşıl enerji imkanlarını da dünyaya çatdırırıq.

Azərbaycan cari ilin noyabrında COP29 kimi iqlim dəyişikliyilə bağlı nəhəng tədbirə ev sahibliyi edəcək. Bu tədbir isə ilk növbədə yaşıl enerjiyə keçidlə bağlı məsələləri özündə ehtiva edir. Bu mənada keçirilən Bakı Enerji Həftəsi Azərbaycanın COP29 tədbirinə keçirməyə mənəvi haqqının olduğunu bir daha nümayiş etdirir.
Bəzi dairələr ölkəmizi ittiham edir ki, Azərbaycan bərpa olunmayan enerji mənbələrilə məşhurdur. Amma sübut edirik ki, ölkəmizin yaşıl enerji ilə bağlı da geniş imkanları mövcuddur. İyunun 4-də Bakı Enerji Həftəsinin açılış günündə BƏƏ şirkətilə Biləsuvar, Neftçala, Abşeron, Qaradağda günəş və külək enerjisilə bağlı təməlqoyma mərasimləri də oldu. BƏƏ şirkəti Qaradağda 230 meqavat yaşıl enerji mənbəyinin istehsalına başlayıb. Daha 3 müqavilənin imzalanması ilə bu istehsal daha da artacaq.

Prezidentin də vurğuladığı kimi, bu istiqamətdə Qarabağ və Şərqi Zəngəzurun da potensialı böyükdür.  İndiyə kimi 270 meqavatlıq su elektrik stansiyaları tikilib. Hədəf bir neçə ilə onu 500 meqavata çatdırmaqdır. Təkcə Xəzər dənizinin 157 geqavatlıq yaşıl enerji potensialı var”.

Deputat deyir ki, bu tədbirlə Azərbaycan dünyanın nəhəng enerji şirkətləri və dövlətlərinə dünyanın üzləşdiyi ən ciddi problemin iqlim dəyişikliyilə bağlı olduğu mesajını verdi: 

“Bakı Enerji Həftəsi COP29-un baş məşqi hesab oluna bilər. Bu tədbirlə Azərbaycan bir daha dünyanın nəhəng enerji şirkətləri və dövlətlərinə dünyanın üzləşdiyi ən ciddi problemin iqlim dəyişikliyi ilə bağlı olduğu mesajını verdi. Bakı Enerji Həftəsini keçirməklə isə Azərbaycan öz potensialını ortaya qoyur. Noyabrda isə bu istiqamətdə daha böyük hədəflərə imza atacağıq”.

Rüfət Sultan, Bizim.Media