Azərbaycan kuboku: “Qəbələ” yarımfinala vəsiqə qazandı

Fevralın 13-də futbol üzrə Azərbaycan kubokunda dörddəbir final mərhələsinin daha bir cavab görüşü keçirilib.

Bizim.Media xəbər verir ki, "Qəbələ" doğma meydanda "Sumqayıt"la qarşılaşıb.

Oyun 1:1 hesabı ilə yekunlaşıb.

Matçda ilk qolu meydan sahibləri vurublar. Qarşılaşmanın 18-ci dəqiqəsində İsnik Alimi adını tabloya yazdırıb.

Qonaqların bərabərlik qoluna isə yeni transfer edilən Araz Abdullayev imza atıb.

Oyunun 82-ci dəqiqəsində penaltidən fərqlənən 30 yaşlı yarımmüdafiəçi Azərbaycana qayıdışını qolla qeyd edib.

İlk oyunda 1:0 hesablı qələbə qazanmış "Qəbələ" doğma meydandakı heç-heçədən sonra yarımfinala adlayıb.

"Qırmızı-qaralar"ın bu raunddakı rəqibi "Qarabağ" klubu olacaq.

Qeyd edək ki, dörddəbir finalın son matçında "Zirə" klubu "Səbail"in qonağı olacaq. Görüş 18:00-da başlayacaq.

"Qartallar" ilk matçda rəqibini 4:0 hesabı ilə darmadağın edib. Cütün qalibi yarımfinalda "Neftçi"yə rəqib olacaq.

Bizim.Media