Şəki-Zaqatala bölgəsində iki aydan çox idi ki, yağış yağmır, mülayim hava müşahidə olunurdu. Lakin ötən günün ikinci yarsından başlayaraq bölgənin dağlıq və dağətəyi yaşayış məntəqələrində havanın temperaturu aşağı enməyə başlayıb. Bu gün səhər saatlarında yüksək dağlıq ərazilərə qar yağıb.
Bizim.Media-nın yerli bürosu xəbər verir ki, dağətəyi kəndlərdə temperatur 5-6, aranda 7-9 dərəcə arasında dəyişir.
Bölgədən keçən Yevlax-Zaqatala-Gürgüstan magistralında nəqliyyatın hərəkətində heç bir çətinlik yaşanmasa da Qaraməryəm-İsmayıllı-Şəki avtomobil yolunun bəzi hissələrində çiskinli-duman müşahidə olunur.
Görmə məsafəsi bəzən 50-60 metrə kimi yaxınlaşır. Sürücülərin diqqətinə çatdırılır ki, bu avtomobil yolundan istifadə edəndə sürət həddinə əməl etsinlər.
Bölgə rayonlarında qeyri-sabit hava şəraiti davam edir.



Tural Rasimoğlu, Bizim.Media, Şimal-Qərb bürosu
































































































