Akif Nağı və Rövşən Əhmədli İrana gedib

Qarabağ Azadlıq Təşkilatının (QAT) sədri Akif Nağı və Qarabağ Uğrunda İslami Müqavimət Hərəkatının sədri Rövşən Əhmədli İrana səfər edib. Azad Qarabağ Uğrunda Alyansda təmsil olunan hər iki təşkilatın rəhbərliyi Təbriz Universitetində “İslam dünyası və Qaraba𔝠adlı konfransda iştirak edəcəklər. QAT-ın mətbuat xidmətinin məlumatına görə, onlar Beynəlxalq Qarabağ konfransına dair müzakirələr  aparacaq, Qarabağ həqiqətlərinin təbliği ilə bağlı bir sıra görüşlər keçirəcəklər. Xatırladaq ki, bundan öncə sözügedən konfransın günü müəyyən edilsə də, sonradan heç bir səbəb göstərilmədən təxirə salınmışdı. Bəzi ekspertlər burada İrandakı erməni lobbisinin təsirinin olduğunu deyirdi. Digər ekspertlər isə bunu Culfa hadisələrinin ardınca İran-Azərbaycan sərhədində yaranmış gərgin vəziyyətin nəticəsi kimi izah edirdilər.