Ukrayna prezidenti Volodimir Zelenskinin həyat yoldaşı və uşaqlarının (Aleksandra və Kiril adlı iki övladı var) Prezident Aparatının binasında onunla birlikdə qalması qadağan edilib. Müharibə başlayandan prezident ailəsi ilə ancaq telefonla əlaqə saxlayıb.
Bizim.Media “strana.today” saytına istinadən xəbər verir ki, bu barədə Ukrayna prezidentinin həyat yoldaşı Yelena Zelenskaya “Vogue” nəşrinə müsahibəsində bildirib.
"İlk günlərdə ümid edirdim ki, biz onunla qala bilərik. Amma prezident aparatı hərbi obyektə çevrildi və bizə orada uşaqlarla qalmağı qadağan etdilər. Təhlükəsiz yerə köçmək əmri verildi. Onsuz da indi Ukraynanın harasında təhlükəsiz yer tapılar? O vaxtdan biz Volodimirlə ancaq telefonla əlaqə saxlayırıq”.
MÖVZU İLƏ BAĞLI:
Zelenskinin həyat yoldaşı: "Bu ölümlərdən tək Rusiya günahkardır?"
O, həmçinin son dəqiqəyədək rus ordusunun hücum edəcəyinə inanmadığını bildirib.
Onun sözlərinə görə, işğaldan bir gün əvvəl ailə adi işlərlə məşğul olub:
“Lakin gərgin idik, çünki hər yerdə işğal haqqında çox danışılırdı”.
“Səhər saat 4-5 arasında qapının döyülməsindən oyandım. Partlayış olduğunu dərhal anlamadım. Ərim yataqda deyildi. Amma ayağa qalxanda dərhal onun kostyum geyindiyini gördüm. "Başladı". Onun dediyi tək söz bu oldu”, - deyə o xatırlayıb.
“Həmin vaxt uşaqlara görə narahat oldum. Ərim əlavə təlimatları gözləməyi xahiş etdi, zəruri əşyaları və sənədləri toplamağı tövsiyə etdi və evdən çıxdı" deyə Zelenskaya bildirib.
Xatırladaq ki, Ukraynada müharibə 47-ci gündür ki, davam edir. Prezident Aparatının rəhbərinin müşaviri Aleksey Arestoviçin sözlərinə görə, Rusiya ordusunun hücumunun ikinci mərhələsi artıq başlayıb. Ukrayna Silahlı Qüvvələrinin Baş Qərargahı isə aprelin 11-də səhər saatlarında Rusiyanın şərqdəki hücumunun yaxın günlərdə başlayacağını bildirib.
Bizim.Media
