Məşhur türkiyəli aktyorun adına film festivalı keçiriləcək

Məşhur türkiyəli aktyor Tuncel Kurtizin xatirəsinə film festivalı təşkil olunacaq.

Bizim.Media türk mediasına istinadla xəbər verir ki, “Qardan bəyaz pərdə” film festivalı martın 2-dən başlayır.

Qeyd edək ki, festivalın ideyası aktyorun özünə aiddir. Ömrünün son günlərində bu barədə dostlarına da danışıb.

Xatırladaq ki, Tuncel Tayanç Kurtiz 1 fevral 1936-cı ildə Kocaelidə dünyaya gəlib.  Haydarpaşa liseyini bitirib, qısa müddət universitetdə hüquq, sonra filologiya, fəlsəfə, psixologiya və incəsənət tarixi üzrə təhsil alıb, lakin heç birini bitirməyib. 

İlk dəfə 1959-cu ildə Dormen Teatrında aktyorluğa başlayan sənətçi filmlərdə rol alıb. 
1979-cu ildə çəkilən Gül Həsən filmi ilə rejissorluq debütü edib. Nurettin Sezerlə birlikdə yazdığı Gül Həsən filminin ssenarisi ilə 1981-ci ildə keçirilən Antalya Qızıl Portağal Film Festivalında ən yaxşı ssenari mükafatını qazanıb. Erol Keskin, Hadi Çaman, Erol Günaydın və Hadi Çamanla birlikdə Genar Teatrını qurub. 80-ci illərdə xaricdə yaşamağa başlayıb. 2006-cı ildə Hacı, 2007-ci ildə Asi seriallarında rol alıb. 

2009-cu ilin əvvəlində ekranlara çıxan “Payız sancısı” filmində Kamil Əfəndi obrazını canlandırıb. Elə həmin il yayıma başlayan “Ezel” serialında Ramiz Karaeski obrazını canlandırıb və daha da tanınıb.

2011-ci ilin oktyabrında 48-ci Qızıl Portağal Film Festivalında Ömürlük Şərəf Mükafatını alıb. 
27 sentyabr 2013-cü ildə İstanbulun Etiler səmtindəki evində 77 yaşında vəfat edib.  29 sentyabr 2013-cü ildə Balıkəsirdə Edremit rayonunun Çamlıbel kəndində dəfn edilib.

Bizim.Media