Çində qonşular arasında mübahisə qəribə qisas üsulu ilə nəticələnib.
Bizim.Media xəbər verir ki, yerli sakin qonşusundan intiqam almaq üçün hər gün səsucaldıcı vasitəsilə 10 saatdan çox kabus və ruhlar haqqında audioyazılar səsləndirib.
Hadisə Quançjou şəhərində baş verib və sonradan məhkəməyə qədər gedib çıxıb. Bu barədə South China Morning Post məlumat yayıb.
Məlumata görə, Li və Lu soyadlı şəxslər səsucaldıcını ortaq divara yaxın yerləşdirərək səhər 08:45-dən 12:00-dək, daha sonra isə 15:30-dan 22:00-dək ruhlar barədə hekayələri fasiləsiz dövrə ilə səsləndiriblər. Bununla da qonşunun mənzilində hər gün 10 saatdan artıq vahiməli səslər eşidilib.
Bildirilib ki, səs səviyyəsi qanunla icazə verilən həddən bir qədər aşağı saxlanılıb.
Buna baxmayaraq, bu “qisas aksiyası” təkcə hədəfə alınan qonşuya yox, yuxarı mərtəbədə yaşayanlara da ciddi narahatlıq yaradıb və onların normal həyatına mane olub.
Hadisə sosial şəbəkələrdə də istehza və müzakirə dalğası doğurub.

Bizim.Media































































































