Rusiya istehsalı olan Mi-28NE “Havok” zərbə helikopterləri və Su-35 qırıcıları İranın uzun illərdir zəifləyən silahlı qüvvələrini bərpa etmək üçün yetərli deyil.
Bizim.Media xəbər verir ki, bu barədə Forbes nəşri yazıb.
Tehranın səmasında uçan Mi-28NE helikopterlərinin ilk görüntüləri yayılıb. Nəşrin məlumatına görə, bu, İranın sifariş edib ödəniş etdiyi Rusiya hərbi texnikasının, o cümlədən Su-35 qırıcılarının son tədarüklərindən biridir.
ABŞ-ın ISW (Institute for the Study of War) analitiklərinin qiymətləndirməsinə əsasən, Rusiya sistemlərinin tam və sürətlə çatdırılması belə, onilliklər ərzində tənəzzülə uğramış İranın müntəzəm silahlı qüvvələrini dirçəltməyə kifayət etməyəcək. Bunun səbəbi Tehran rəhbərliyinin uzun müddət əsas prioriteti SEPAH-a verməsi və köhnəlmiş texnikadan istifadə etməsidir.
Hazırda Mi-28 helikopterlərinin Tehrandakı Mehrabad Beynəlxalq Hava Limanında yerləşdirildiyi bildirilir. Analitiklər hesab edir ki, İran bu helikopterlərdən daha çox daxili iğtişaşlar və etirazlar zamanı istifadə edə bilər, nəinki ABŞ və ya İsrail Hərbi Hava Qüvvələrinə qarşı.
İranın 50-yə qədər Su-35 qırıcısı sifariş etdiyi bildirilir. Bu təyyarələr köhnəlmiş F-14A “Tomcat” və MiQ-29-ları əvəz etməlidir. Lakin ekspertlərin fikrincə, bu say regionda qüvvələr balansını ciddi şəkildə dəyişməyəcək. ABŞ və İsrailin müttəfiqlərinin müasir döyüş təyyarələri İranın yeni aldığı texnikadan xeyli üstündür.
Nəşr qeyd edir ki, İranın müntəzəm ordusunun onillik tənəzzülü səbəbindən sürətli və fundamental bərpa real görünmür. Rejim əsasən SEPAH-a, ballistik raketlərə və pilotsuz uçuş aparatlarına arxalanmaqda davam edir.
Forbes yekunda bildirir ki, Mi-28 və Su-35 tədarükləri simvolik yenilənmə olsa da, İran silahlı qüvvələrinin struktur zəifliyini dəyişməyəcək.
Bizim.Media
