Milyarder maliyyəçi Ceffri Epşteynlə bağlı ortaya çıxan yeni sənədlər onun illər boyu dünyanın ən güclü şəxslərini hədəf alan nəhəng bir “bal tələsi” əməliyyatı apardığını və bu şəbəkədə Rusiya kəşfiyyatı KQB-nin adından istifadə edildiyi üzə çıxıb.
Bizim.Media xəbər verir ki, iddialara görə, Epşteyn qadınlardan və gənc qızlardan istifadə edərək siyasətçilər, iş adamları və məşhurlar barəsində şantaj materialları toplayıb. Onunla bağlı yayımlanan 3 milyondan çox yeni sənəd, Epşteynin təkcə cinayətkar deyil, həm də qlobal miqyasda bir şantaj mexanizminin mərkəzində dayana biləcəyini göstərir.
Sənədlərdə Epşteynin Rusiya prezidenti Vladimir Putinlə görüşlər təşkil etməyə çalışdığı, həmçinin Tramp–Putin zirvəsi ərəfəsində Kremlə Donald Tramp barədə məlumat təqdim edə biləcəyini bildirdiyi mesajlar yer alır.
Uşaq istismarı ittihamları ilə məhkum edilmiş və 2019-cu ildə həbsxanada ölü tapılan Epşteynlə bağlı bu yeni məlumatlar beynəlxalq ictimaiyyətdə böyük rezonans doğurub. Kəşfiyyat mənbələrinə əsaslanan iddialara görə, o, illər ərzində dünyanın ən nüfuzlu şəxslərini hədəf alan genişmiqyaslı “bal tələsi” əməliyyatı qurub və bu sistem KQB-nin maraqlarına xidmət edib.
Təhlükəsizlik mənbələri bildirir ki, Epşteyn qadınlar və gənc qızlar vasitəsilə siyasətçilər, iş adamları və məşhur simalar haqqında “kompromat” – yəni şantaj materialları toplayıb.
Sənədlərdə diqqət çəkən məqamlardan biri də Vladimir Putinin adının yüzlərlə dəfə çəkilməsidir. Dosyelərə görə, Epşteyn 2008-ci ildə azyaşlıların fahişəliyinə vasitəçilik ittihamı ilə məhkum olunsa da, sonrakı illərdə Putinlə görüşlər təşkil etməyə cəhd göstərib.
2011 və 2014-cü illərə aid elektron məktublarda Epşteynin Putinlə görüş planlaşdırdığına dair ifadələr yer alır. Bu görüşlərin reallaşıb-reallaşmadığı dəqiq bilinməsə də, yazışmalar onun Kreml ilə birbaşa əlaqə qurmağa çalışdığını göstərir.
ABŞ təhlükəsizlik rəsmiləri Epşteynin qurduğu sistemin misilsiz ölçülərə malik olduğunu bildirirlər. Kəşfiyyat mənbələrindən biri vəziyyəti belə şərh edir:
“Donald Tramp, Bill Klinton, şahzadə Endryu kimi çox güclü şəxslər yüksək təhlükəsizliyi olan bir adada gizli şəkildə lentə alınıb. Bu, tarixdə görünmüş ən böyük bal tələsi əməliyyatı ola bilər.”
İddialara görə, Epşteyn Rusiya və Şərqi Avropadan gətirilən qadınlardan istifadə edərək bu şəxsləri gizli münasibətlərə cəlb edib, daha sonra əldə edilən görüntüləri şantaj məqsədilə saxlayıb.
Mütəxəssislər Epşteynin bu dünyaya girişinin Robert Maksvel vasitəsilə baş verdiyini düşünürlər. Maksvel 1991-ci ildə şübhəli şəkildə həyatını itirmiş media maqnatı idi və uzun illər Rusiya kəşfiyyatı ilə İsrailin Mossad xüsusi xidməti ilə əlaqədə olmaqda ittiham olunurdu.
Maksvelin qızı Gisleyn Maksvel Epşteynlə birlikdə uşaq cinsi istismarı şəbəkəsində iştirak etdiyinə görə 20 il həbs cəzası alıb. Sənədlərdə Epşteynin Mossad adına da çalışmış ola biləcəyi barədə FBI-a edilmiş xəbərdarlıqlar yer alır.
FBI qeydlərinə görə, Epşteynin İsrailin sabiq baş naziri Ehud Barakla yaxın münasibətləri olub. Sənədlərdə Epşteynin Baraka Putin komandasına dair kəşfiyyat məlumatları ötürdüyü və casusluq fəaliyyəti ilə məşğul ola biləcəyi iddia edilir.
Bundan əlavə, Epşteynin Tramp–Putin görüşü ərəfəsində Kremlə Tramp haqqında məlumat təqdim etməyə hazır olduğunu bildirdiyi mesajlar da dosyelərdə əksini tapıb.
Ceffri Epşteyn 2019-cu ildə ABŞ-da həbsxanada ölü tapılıb. Rəsmi versiyaya görə, ölüm səbəbi intihardır. Lakin ailəsi və bəzi hüquqşünaslar onun susdurulmaq üçün öldürüldüyünə inanırlar.
Sənədlərdə adı çəkilən bütün məşhur və siyasi fiqurlar isə hər hansı cinayətə qarışdıqları ilə bağlı iddiaları rədd edirlər.
Bizim.Media
