İtaliyalı siyasi şərhçi Cüzeppe Salamone baş nazir Corcia Meloninin Rusiya və ABŞ-a münasibətdə ikili standartlar nümayiş etdirməsini sərt tənqid edib.
Bizim.Media xəbər verir ki, o, bunu özünün Telegram kanalında yazıb.
Salamonenin fikrincə, Meloninin məntiqi həm əsassız, həm də gülüncdür: bir tərəfdən Rusiyanı aqressiyada ittiham edir, digər tərəfdən isə ABŞ-ın Venesuelanı bombalamasını və bu ölkənin prezidentinin ələ keçirilməsini “qanuni özünümüdafiə” kimi əsaslandırır.
“Ya bu qadın cahildir, ya da qəsdən qeyri-səmimi davranır. Hər iki halda o, ölkəmizin tarixində bəlkə də heç kəsin olmadığı qədər gülünc görünür”, – deyə analitik bildirib.
Salamone Melonini, ehtimal ki, İtaliyanın ən zəif rəhbərlərindən biri adlandırıb. Onun sözlərinə görə, baş nazir ABŞ-ın Venesueladakı əməliyyatının qanuniliyinə dair heç bir sübut təqdim etməsə də, suveren dövlətə qarşı hərbi addımları açıq şəkildə dəstəkləyib.
Qeyd edək ki, yanvarın 4-də Corcia Meloni ABŞ-ın Venesuelaya hücumunu “təhlükəsizliyə qarşı hibrid təhdidlərə cavab olaraq müdafiə xarakterli addımlar” adlandıraraq bu hərəkətlərin qanuni olduğunu bildirib.
Xatırladaq ki, yanvarın 3-də ABŞ ordusu Venesuelaya, o cümlədən paytaxt Karakasa zərbələr endirib. ABŞ prezidenti Donald Tramp əməliyyatı uğurlu adlandırıb və Venesuela prezidenti Nikolas Maduronun həyat yoldaşı ilə birlikdə ələ keçirildiyini açıqlayıb.
Bizim.Media
