Tehranda gərginlik: Polislə toqquşmalar davam edir – VİDEO

Tehranın mərkəzi bazarında genişmiqyaslı iğtişaşlar və polis ilə toqquşmalar baş verib. Polis xüsusi vasitələrdən istifadə edib.

Bizim.Media xəbər verir ki, bu barədə teleqram-kanallarda məlumatlar yayılıb.

Müxalifət kanalları şəhər sakinlərini parlament binasına doğru hərəkət etməyə və onu ələ keçirməyə çağırır.

İranda kütləvi etirazlar artıq onuncu gündür davam edir. İslam Respublikasının Xarici İşlər Nazirliyi ABŞ və İsraili ölkənin daxili işlərinə müdaxilə etməkdə və kütləvi zorakılığa çağırmaqda günahlandırıb.

İranın məhkəmə hakimiyyətinin rəhbəri Golam Hosseyn Mohseni Əccei bildirib ki, hakimiyyət etirazçılara qarşı güzəşt etməməlidir:

“Biz öz mənafeyimiz üçün vəziyyətdən istifadə etməyə, xalqın təhlükəsizliyini və sakitliyini pozmağa çalışanlara göz yummaqla susmamalıyıq… İğtişaşlarda iştirak edənlərə qarşı heç bir güzəşt olmayacaq. Bu dəfə güzəştsizlik olacaq.”

Əccei həmçinin ölkə üzrə prokurorluğun iğtişaşlarla bağlı saxlanılan şəxsləri, o cümlədən etirazçılara kömək edənləri təqib etməli olduğunu bildirib. O, həmçinin əsas təşkilatçı adlandırdığı şəxslərin müəyyən edilməsi və onlara qarşı tədbirlərin görülməsi çağırışı edib.

ABŞ-da yerləşən İnsan Hüquqları üzrə Məlumat Agentliyi (HRANA) məlumat verir ki, etirazlar ölkə üzrə 222 yerdə baş verib, o cümlədən 26 vilayətdə 78 şəhərdə mitinqlər keçirilib.


Bizim.Media