“Hörümçək toru” əməliyyatından sonra Rusiyanın “Belaya” aerodromu – ŞOK FOTOLAR

2025-ci il iyunun 4-də yayımlanan Planet Labs peyk şəkilləri Rusiya Federasiyasının “Belaya” hərbi aerodromuna təşkil olunmuş Ukrayna Təhlükəsizlik Xidmətinin (UTX) dron hücumlarının nəticələrini təsdiqləyib.

Bizim.Media xəbər verir ki, jurnalist-tədqiqatçılar qrupu olan “Sxemı” tərəfindən əldə edilən həmin görüntülərdə ən azı 7 strateji bombardmançı təyyarənin zədələndiyi aydın görünür.

Onlardan:

3-ü Tu-95 strateji bombardmançısıdır;

4-ü isə Tu-22 uzun mənzilli taktiki bombardmançı təyyarələridir.

Qeyd olunur ki, zədələnmiş təyyarələrdən 3-ü artıq Rusiya tərəfindən istehsal olunmur. Bu isə onların bərpasını çətin və ya mümkünsüz edir.

Peyk görüntülərində həmçinin aerodrom ərazisində baş vermiş yanğınların izləri, yanan təyyarələrin konturları və partlayışdan sonra qalan kraterlər müşahidə edilir. Bu, hücumun müvəffəqiyyətlə planlaşdırılmış və yüksək dəqiqliklə həyata keçirilmiş olduğunu sübut edir.

Xatırladaq ki, 2025-ci il 1 iyun tarixində UTX tərəfindən həyata keçirilən və 1,5 ildən artıq müddətdə hazırlanan unikal xüsusi əməliyyat “Hörümçək toru” adlandırılıb. Əməliyyat çərçivəsində Rusiya ərazisindəki dörd strateji hərbi aerodroma eyni vaxtda dron hücumları həyata keçirilib:

“Belaya” (İrkutsk vilayəti)

“Dyaqilevo” (Ryazan vilayəti)

“Olenya” (Murmansk vilayəti)

“İvanovo” (İvanovo vilayəti).

Bu koordinasiyalı hücumların nəticəsində 41 ədəd Rusiya strateji aviasiya təyyarəsi sıradan çıxarılıb, bəziləri tamamilə məhv edilib.

Zədələnən və məhv edilən təyyarələr Rusiya Silahlı Qüvvələrinin nüvə daşıma qabiliyyətinə malik hava komponentinə aiddir. Xüsusilə Tu-95 və Tu-22M3 tipli təyyarələr Ukraynaya qarşı raket zərbələri endirmək üçün istifadə olunurdu. Bu səbəbdən onların sıradan çıxarılması Moskvanın strateji imkanlarını ciddi şəkildə məhdudlaşdırır.

Ekspertlərə görə, “Hörümçək toru” əməliyyatı Ukraynanın dron texnologiyaları sahəsində çatdığı yüksək səviyyəni və Rusiya ordusunun hava müdafiəsindəki zəif nöqtələri bir daha üzə çıxarıb.









Bizim.Media