Rusiya qazının “Türk axını” boru kəməri ilə Avropaya nəqli ardıcıl ikinci həftədir ki, tarixi rekord qırıb.
Bizim.Media bu barədə Avropa Qaz Ötürmə Sistemləri Operatorları Şəbəkəsinin (ENTSOG) məlumatlarına əsaslanan hesablamalara istinadən xəbər verir.
Belə ki, fevralın 10-dan 16-dək Türkiyə-Bolqarıstan sərhədində yerləşən “Stranca-2” kompressor stansiyasından (“Türk axını”nın dəniz hissəsinin quruda davamı) nəqletmə həcmi 396 milyon kubmetri ötüb. Bu, 2020-ci ilin yanvarında qaz kəmərinin istifadəyə verilməsindən bəri tədarüklər üzrə mütləq həftəlik rekorddur. Əvvəlki maksimum göstərici - təxminən 392 milyon kubmetr bir həftə əvvəl müşahidə olunub.
Həmçinin fevralın 10-da kəmərlə rekord gündəlik qaz tədarükü 56,7 milyon kubmetrə çatıb. Belə ki, fevralda “Türk axını” boru kəmərinin Avropa istiqamətində orta yükü 2024-cü ilin dekabr ayı ilə müqayisədə 12 faiz, yanvar ayı ilə müqayisədə isə 10 faiz çoxdur.
Daha əvvəl TASS ENTSOG-un məlumatlarına istinadla bildirmişdi ki, yanvarda “Türk axını” qaz kəməri ilə Avropaya tədarük rekord həddə - 1,56 milyard kubmetrə çatıb. 2024-cü ildə bu marşrut üzrə nəql 23 faiz artaraq 16,7 milyard kubmetrə çatıb.
2025-ci il yanvarın 27-də Budapeşt Brüsseldən ona enerji təhlükəsizliyinə təminat verilməsi, o cümlədən Ukraynanın Rusiya Federasiyasından qaz tranzitini bərpa etməsi, “Drujba” boru kəməri ilə Rusiya neftinin tranzitinin dayandırılmasının qarşısının alınması və “Türk axını” qaz kəmərinin hücumlardan qorunması ilə bağlı təminat alıb. Buna cavab olaraq, Macarıstan Aİ-nin Rusiyaya qarşı sektoral sanksiyalarını yanvarın 31-dən sonra daha 6 ay müddətinə uzatmağa razılaşıb.
Rusiyadan Türkiyəyə Qara dəniz vasitəsilə uzanan və 31,5 milyard kubmetr tutumlu “Türk axını” qaz kəməri Türkiyə və Cənubi və Cənub-Şərqi Avropa ölkələrinin qaz təchizatı üçün nəzərdə tutulub. Bu xətt Ukrayna ərazisindən tranzit dayandırıldıqdan sonra Rusiya qazının Avropaya nəqli üçün sonuncu aktiv marşrut olaraq qalır. “Türk axını”nın başlanğıc nöqtəsi Anapa bölgəsində tikilmiş “Russkaya” kompressor stansiyasıdır.
Bizim.Media
