Güney Azərbaycanın Culfa şəhərindən olan vəkil Yılmaz Mehrəlibəyli Təbrizdə etiraz aksiyası keçirib.
Bizim.Media Günaz TV-yə istinadən xəbər verir ki, o, 26 fevral - Vəkillər Günündə Şərqi Azərbaycan Vəkillər Kollegiyasının müstəqil vəkillik fəaliyyətlərinə müdaxiləsinə, onun vəkillik fəaliyyətinə dair lisenziyanın verilməməsinə etiraz olaraq, adıçəkilən qurumun binası qarşısında aksiyaya əl atıb.
Mehrəlibəyli Şərqi Azərbaycan Vəkillər Kollegiyasının binası qarşısında əlində "Azərbaycan xalqının hüquqlarını müdafiə etdiyim üçün vəkillik fəaliyyətindən məhrum edilmişəm.
Vəkillər Günü mübarək. Qeyri-müstəqil idarə heyəti getməlidir, kollegiya qalmalıdır" məzmunlu plakat qaldırıb.
O, vəkillərin müstəqil fəaliyyət aparmasının vacibliyini vurğulayaraq qeyd edib ki, Şərqi Azərbaycan Vəkillər Kollegiyası hakimiyyətin tapşırığı ilə işlədiyi üçün ədalətdən danışmaq olmaz.
Bizim.Media
