İş axtaranlara XOŞ XƏBƏR – “Mütləq qeydiyyatdan keçin”

Saxta iş elanları ilə məşğul olan fırıldaqçıların sayı artmaqda davam edir.

Müxtəlif platformalardan sözdə real iş elanları paylaşan bu fırıldaqçılarla mübarizə aparmaq uzun zamandır ki, müşkülə çevrilib.

Baxmayaraq ki, bəzi özəl şirkətlərin saxta fəaliyyəti ifşa olunub, bəziləri barədə isə inzibati tədbir görülüb. Buna rəğmən saxta iş elanlarının qurbanlarına çevrilənlər var.

Məsələ burasındadır ki, qurbana çevrilənlərlə bağlı aidiyyəti qurumlara kütləvi müraciətlər yoxdur. Səbəb isə “işbazlar” tərəfindən aldadıldıqları məbləğin elə də böyük olmaması ilə bağlıdır.

Məsələ burasındadır ki, iş təklif edən şirkət iş axtarandan 10 və ya 20 manat müqabilində xidmət haqqı tələb edir. Məbləği aldıqdan sonra vətəndaşa hər hansı bir ünvan verib, ora göndərir.

Qurban həmin ünvana çatanda aldadıldığını anlayır. Bu şəkildə gün ərzində yüzlərlə iş axtaran tora düşür. Problem isə birdəfəlik çözülmür.

Mövzu ilə bağlı Bizim.Media-ya danışan Vətəndaşların Əmək Hüquqlarını Müdafiə Liqasının sədri Sahib Məmmədov iş axtaranların Dövlət Məşğulluq Agentliyinin müvafiq şöbələrinə müraciət etmələrini tövsiyyə edib:

“Onlar indi yaxşı alt sistem və baza yaradır. İlk növbədə orada qeydiyyatdan keçmək məsləhət olunur. Şübhəli iş elanlarının 2 növ qurbanları olur.

Birinci, dələduzların qurbanı olub nisbətən pul itirənlər, ikincisi daha təhlükəli olan insan alverinin qurbanına çevrilənlərdir.

İş axtarandan əvvəlcədən müəyyən məbləğdə pul götürən işədüzəltmə bürosu artıq bu başdan şübhəlidir.

Burada nisbətən kiçik məbləğdən söhbət getdiyi üçün insanlar şikayət etmir.

20-30 manat aldanır, fikirləşir ki, polisə şikayət etsə, 3-4 dəfə izahat verəcək, gedib-gəlməyə vaxtı gedəcək və itirdiyindən də daha çox yollara pulu gedəcək.

Bir iki şikayətlə isə məsələ bitmir. Burada uzaqbaşı inzibati məsuliyyət olur. Amma kütləvi olanda, bu, dələduzluq kimi qiymətləndirilə bilər. Yeganə yol məlumatlı olmağa qalır”.

Sahib Məmmədovun sözlərinə görə xaricdə ciddi işədüzəltmə büroları pulu iş axtarandan deyil, işəgötürəndən alır:

“Məsələn, işəgötürən deyir ki, mənə filan peşəkarlığı olan işçi lazımdır. İşədüzəltmə bürosu onu tapır, müsahibə aparır və gətirib işəgötürənə təqdim edir.

İşəgötürən isə həmin büroya pul ödəyir. Həm Beynəlxalq Əmək Təşkilatının bir konvensiyasına qoşulmuşuq. Ona görə də rəsmi işədüzəltmə büroları iş axtarandan heç vaxt pul ala bilməz. Amma hər yerindən duran sosial şəbəkələrdə elan verir və insanları aldadır”.

Müsahibimiz hazırda Əmək və Əhalinin Sosial Müdafiəsi Nazirliyinin də bu problemi həll etmək üçün müəyyən işlər gördüyünü vurğulayıb:

“Həmçinin 2018-ci ildə qəbul olunmuş yeni qanuna görə vakansiyalar alt sistemi və iş axtaranlara elektron bazası yaradılır. Bununla da iş axtaranlarla işə götürənlər elektron sistemdə görüşə biləcək.

O demək deyil ki, özəl işədüzəltmə büroları fəaliyyət göstərməməlidir. Qanun hüquqi şəxslərə icazə verir. Amma onların içərisində tanınmışları, daimi ofisləri və rəsmi səhifələri olanlar var ki, onlarla işləmək məsləhətlidir”.

Alçina Amilqızı, Bizim.Media