Bizim.Media-nın bir neçə saat bundan əvvəl, “Liftlərdə ölənlərə görə kim cavab verməlidir? – Məsuliyyəti heç bir orqan DAŞIMIR” başlıqla dərc etdiyi yazıya Bakı Şəhər İcra Hakimiyyətindən dərhal reaksiya gəlib.
“MTK-lara məxsus binalardakı lift problemləri və yaranan qəza hadisələri Bakı Şəhər İcra Hakimiyyətinin tabeliyindəki "Lifttəmir" İstehsalat Birliyinə aid deyil".
Belə bir açıqlamanı Bizim.Media-ya Bakı Şəhər İcra Hakimiyyətinin Mətbuat Xidmətinin rəhbəri İsrafil Kərimov göndərib.
MÖVZU İLƏ BAĞLI:
Liftlərdə ölənlərə görə kim cavab verməlidir? – Məsuliyyəti heç bir orqan DAŞIMIR
Onun sözlərinə görə, korporativ tikililərdə baş verən bu tip hadisələrə görə, sözügedən qurum məsuliyyət daşımır:
"Mənzil Tikinti Korporativləri tərəfindən tikilən binalar hazırda həddindən artıq çoxdur. Binaların da liftləri həmin korporativlərin rəhbərlərinin hansısa qurum, MMC və digər mütəxəssislər tərəfindən bağladığı müqavilə əsasında qurulur. "Lifftəmir" istehsalat birliyi isə onun səlahiyyətində olan binaların lift problemlərinə cavabdehdir", - deyə qurum rəsmisi bildirib.
Qeyd edək ki, son günlərdə baş verən lift qəzaları İsrafil Kərimovun dediyi kimi, MTK-lara məxsus çoxmərtəbəli yaşayış binalarında baş verib.
Səkinə Yusibli, Bizim.Media
