Samuxda tanışların münaqişəsi qanla bitdi - 33 yaşlı kişi qətlə yetirildi 

Samux rayonunda qətl hadisəsi baş verib. 

Bu barədə Bizim.Media-ya Samux rayon prokurorluğundan məlumat verilib.  

Bildirilir ki, iyunun 22-i saat 01 radələrində Samux rayonu, Füzuli kəndi ərazisində 1989-cu il təvəllüdlü Cavid Əliyevin öldürülməsi barədə rayon prokurorluğuna məlumat daxil olub. 

Aparılmış ilkin araşdırmalarla zərərçəkmişin tanışı 1990-cı il təvəllüdlü Mədət Tağıyevin yaşadığı evin qarşısında şəxsi münasibətlər zəminində aralarında yaranmış münaqişə zamanı bıçaqla xəsarətlər yetirərək, C.Əliyevi qəsdən öldürməsinə əsaslı şübhələr müəyyən edilib. 

Faktla bağlı Samux rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. M.Tağıyev şübhəli şəxs qismində tutularaq istintaqa cəlb edilib. 
Hazırda cinayət işi üzrə zəruri istintaq tədbirləri davam etdirilir. 

Bizim.Media