Daşkəsəndə güclü leysan - Körpülər dağıldı, avtomobillər çaya düşdü - VİDEO

Bu gün Daşkəsən rayonuna dolu və güclü leysan yağıb.

Bizim.Media-nın yerli bürosu xəbər verir ki, rayonun Çanaqçı və Alaxançallı kəndlərində köpülərə, yol, elektrik, rabitə təsərrüfatlarına, fərdi avtomobillərə, əhalinin əkin sahələrinə və yaylaqlarda vətəndaşların mal-qarasına ciddi ziyan dəyib.

Sel suyu Çanaqçı ilə digər kəndi birləşdirən körpünü tamamilə dağıdıb.

Alaxançallı kəndi ərazisində isə sel suyu bir körpünü dağıdıb, kəndlərarası avtomobil yolunun xeyli hissəsini sıradan çıxarıb. Həmçinin, bir neçə avtomobili çay aparıb.
Bir çox ərazilərdə dağlardan iri qaya parçaları və palçıq kütləsi avtomobil yoluna töküldüyündən həmin ərazilərdə nəqliyyatın hərəkəti tam dayanıb.

Hazırda dəymiş ziyanların həcminin müəyyən edilməsi istiqamətində Daşkəsən Rayon Fövqəladə Hallar Komissiyası tərəfindən işlər davam etdirilir.

Qeyd edək ki, təbii fəlakət nəticəsində insan itkisi və xəsarət alan yoxdur.

Bizim.Media