Azərbaycanda ən çox və ən az şagirdi olan məktəblər açıqlanıb.
Ən az şagirdi olan məktəb Qusar rayon Çətkün kənd ibtidai məktəbidir. Məktəbdə 1 şagird təhsil alır və 2 müəllim çalışır.
Ən çox şagirdi olan təhsil ocağı isə Abşeron rayon Xırdalan şəhər 2 nömrəli tam orta məktəbidir. Məktəbdə 6254 şagird təhsil alır və 426 müəllim çalışır. Qusarın Çətkün kənd məktəbində 1 şagirdin təhsil alması ictimaiyyətdə müzakirələrə səbəb olub. Hətta bir şagirdə görə məktəbin bağlanması məsələsi də ortaya atılıb.
MÖVZU İLƏ BAĞLI:
Bu məktəbi müəllim və şagirdlər TƏRK EDİR - Bələdiyyə sədrindən ŞİKAYƏT
Məsələ ilə bağlı Bizim.Media-ya Qusar Rayon Təhsil Şöbəsindən bildirilib ki, sözügedən məktəbdə 1 şagirdin təhsil alması kəndin kiçik olması və çox ailələrin paytaxta üz tutmaları ilə bağlıdır:
“Şagird sayı bu il azalıb. Həmin sinifdə oturmalı yaşda bir şagirdimiz var. Qalan 4-cü sinfi bitirənlər ümumi orta məktəbə gedib. Çünki gənc ailələrin çoxu şəhərə köçüb”.
Təhsil Şöbəsinin rəsmisinin sözlərinə görə keçən il Çətkün kənd ibtidai məktəbdə 7 şagird, ondan əvvəl 10, iki il əvəl isə 3 şagird təhsil alıb:
“Ucqar və balaca bir kənddir. Gələn il 3-4 şagird olacaq. Bunu Təhsil Nazirliyi də bilir və məktəbin 1 şagirdlə saxlanılması razılaşdırılıb. Bilirsiz ki, məktəb bağlansa, açmaq nə qədər çətin olacaq. Onu da deyim ki, bura Qusar Rayon Təhsil Şöbəsinin rəhbərinin oxuduğu məktəbdir”.
Alçina Amilqızı, Bizim.Media
