Düşünürəm ki, Yeni il Naxçıvanda sadəcə təqvim dəyişməsi deyil – 2026-cı il muxtar respublika üçün məsuliyyət və nəticə ili olacaq. Çünki qarşıya qoyulan vəzifələr daha da böyüyüb, hər bir addımın nəticəsi ön plana çıxır.
Bu il Naxçıvan üçün dayanmadan işləmək, gecikmiş layihələri icraya yönəltmək və real uğurlar yaratmaq ili olacaq; hər qərar, hər təşəbbüs bu qədim və zəngin tarixli diyarın tərəqqisinə xidmət etməlidir.
Təhlillər göstərir ki, bu il Naxçıvan üçün yalnız inkişafa yönələn məsuliyyət ili deyil, həm də hesabat ili olacaq. İcra olunan layihələr, görülən işlər dövlət başçısı qarşısında qiymətləndiriləcək və uğur yalnız konkret nəticələrlə ölçüləcək.
Sahibkarların etimadı və dövlət dəstəyi
Artıq 2026-cı ilin başlanğıcı ilə bağlı sahibkarlar da öz etimadını ifadə ediblər.
Naxçıvan Sahibkarlar Konfederasiyasının Prezident İlham Əliyevə ünvanladığı təşəkkür məktubunda vurğulanır ki, vergi və gömrük güzəştləri, biznes mühitinin yaxşılaşdırılması sahibkarlara yeni imkanlar yaradacaq, muxtar respublikanın iqtisadi potensialını gücləndirəcək.
Məktubda həmçinin qeyd olunur ki, yaradılmış əlverişli şərait və verilən imtiyazlar yerli istehsalın genişlənməsi və yeni iş yerlərinin yaradılması üçün vacibdir.
Dekabrın 11-də Naxçıvana yeni təyin edilmiş səlahiyyətli nümayəndə Ceyhun Cəlilovun sahibkarlarla keçirdiyi görüşdə də eyni mesaj verildi: 2026-cı ildən etibarən 10 illik vergi, gömrük və sosial güzəştlər tətbiq olunacaq və bu, iqtisadi dinamizmin artırılması üçün strateji addımdır.
İnfrastruktur və tranzit: strateji perspektivlər
Naxçıvanda dəmir yolu xətlərinin yenilənməsi və Zəngəzur dəhlizinin reallığa çevrilməsi region üçün yeni inkişaf imkanları açır. Bu dəhliz yalnız turizmi deyil, həm də ticarət, ixrac və investisiya mühitini canlandırır. Sahibkarlar üçün işgüzar imkanlar artacaq, yeni layihələr üçün şərait yaranacaq.
Prezidentin dəfələrlə vurğuladığı kimi: “Nəqliyyat və logistika olmayan yerdə davamlı inkişafdan danışmaq mümkün deyil”
Logistika və tranzit imkanlarının genişlənməsi məhsulun bazarlara çıxış sürətini artıracaq, daşınma xərclərini 25–30 faiz azaldacaq və muxtar respublikanın rəqabət qabiliyyətini yüksəldəcək. Bu perspektiv yalnız infrastrukturla bitmir – strateji idarəetmə və uğurlu kadr siyasəti də bu imkanlardan maksimum istifadə üçün həlledici faktordur.
Sənaye: Naxçıvanın strateji sektoru
Naxçıvanın iqtisadi inkişafında sənaye sektoru xüsusi yer tutur. Təbii sərvətlər, daş düz, mineral sular, tikinti materialları və digər emal sənaye sahələri iqtisadiyyatın dayanıqlı dayaqlarıdır.Bu baxımdan “Cahan-Holding” və “Arkoz” kimi köklü müəssisələrin fəaliyyətinin Naxçıvanda yenidən təşviq olunması və yolunun açılması strateji əhəmiyyət daşıyır.
Belə bir addım yalnız istehsalın artırılmasına deyil, həm də minlərlə yeni iş yerinin yaradılmasına və bölgədə məşğulluğun yüksəlməsinə səbəb olacaq. Eyni zamanda, bu şirkətlər Naxçıvanın ixrac potensialını genişləndirərək regionun iqtisadi müstəqilliyini möhkəmləndirəcək.
Sənayenin inkişafı həm də kənd təsərrüfatı və digər sektorlara əlavə imkanlar açır: yerli xammalın emalı, yüksək əlavə dəyərli məhsulların istehsalı və ixrac bazarlarına çıxışı artırır. Bu baxımdan emal sənaye sahələrində investisiyaların artırılması, mövcud müəssisələrin dəstəklənməsi və dövlət siyasətinin çevik olması strateji əhəmiyyət daşıyır.
Kadr siyasəti: uğurlu inkişafın dayağı
İnkişafın sürəti yalnız infrastruktura və güzəştlərə bağlı deyil. Qarşıya qoyulan vəzifələrin icrası, proqramların vaxtında nəticə verməsi uğurlu kadr islahatlarından birbaşa asılıdır.
Naxçıvanın idarəetmə sisteminə təcrübəli, məsuliyyətli və bacarıqlı kadrların cəlbi həlledici amildir. Bu, yalnız qərarların vaxtında və düzgün icrası üçün deyil, həm də sahibkarlar və dövlət arasında etimadın möhkəmləndirilməsi üçün vacibdir.
2026-cı il həm də yeni liderlərin və idarəçi kadrların sınanması ili olacaq: onlar yalnız plan hazırlamalı deyil, onu icraya yönəltmək və hesabatlılığa nail olmaq üçün məsuliyyət daşıyacaq.
Kənd təsərrüfatı: məhsuldarlıq və dəyər zənciri
Su ehtiyatlarının məhdudluğu kənd təsərrüfatında yeni yanaşmanı zəruri edir. Tütünçülük və üzümçülük kimi az su tələb edən, iqlimə uyğun və ixrac potensialı olan sahələr prioritet olmalıdır. Ayrılan subsidiyaların bölgüsündə isə şəffaflıq əsas götürülməlidir.
Amma məqsəd yalnız əkin deyil, emal, qablaşdırma və bazara çıxış imkanlarını yaratmaqdır. Düzgün emal qurulduqda, üzüm və tütün məhsullarının əlavə dəyəri xammal satışına nisbətən 2–3 dəfə artıq ola bilər.
Bu həm məşğulluğu artırar, həm də Naxçıvan brendinin formalaşmasına xidmət edər.
Hesabat ili: dayanmadan nəticə yaratmaq
Ötən illərdə qəbul edilmiş, lakin ləng icra olunan proqramlar artıq kağız üzərində qalmaqdan çıxmalıdır. 2026-cı il bu baxımdan hesabat və nəticə ilidir. Ayrılan vəsaitlər, qəbul edilən qərarlar və tətbiq olunan güzəştlər konkret nəticələrlə ölçülməlidir.
İnfrastruktur, sahibkar, kadr siyasəti, sənaye və kənd təsərrüfatı sahəsində kompleks yanaşma ilə Naxçıvan 2026-cı ili dayanmadan işləyərək real nəticələr yaratmaq ili kimi yadda saxlamalıdır. İmkanlar yaradılıb, indi söz icradadır.
Unutmayaq ki, Naxçıvan – Azərbaycanın ürəyi, strateji mövqedə yerləşən və üç xarici dövlətlə sərhədini bölüşən qədim diyardır. Zəngəzur işğalı ilə üzləşdiyi bir əsrdən artıq blokadaya baxmayaraq, bu torpaq öz mədəniyyəti, tarixi və ruhu ilə daim ucalıb.
Ona görə də Naxçıvanın çiçəklənməsi yalnız bölgənin deyil, bütövlükdə dövlətimizin güclənməsinin əsas prioritetidir. Hər addımı ilə bu diyar Azərbaycanın tərəqqisinin, dayanıqlı rifahının və gücünün simvolu kimi parlamalıdır.
Sahil Tahirli
