Müstəqillik hər bir xalq üçün varlıq simvoludur. Müstəqillik ideyaları üzərindən qurulan təşkilatlar, partiyalar, cəmiyyət və vəqflər həmin ifadənin yaratdığı məsuliyyəti dərk etməli, onu fəaliyyət prinsiplərinin tərkib hissəsinə çevirməlidir.
Ötən əsrin 80-90-cı illərində azadlıq uğrunda mübarizə şüarı altında yaranan Azərbaycan Xalq Cəbhəsinin adını daşıyan təşkilatın bu gün ortaya qoyduğu dəst-xətt vaxtilə imperiya zülmündən qurtulmaq üçün aparılan milli mücadiləyə ən böyük xəyanətdir. Yarandığı gündən etibarən siyasi hədəflərini ciddi deformasiya edən cəbhə komandasının xəyanət uçurumuna yuvarlanması isə partiyaya uzun illərdən bəri başçılıq edən Əli Kərimlinin yarıtmaz, məkrli fəaliyyəti ilə birbaşa bağlıdır. AXC-də toplaşan siyasətçilərin bir-bir partiyanı tərk etməsi, qaragüruhçu və xəyanətkar düşüncəli şəxslərin isə quruma cəlb edilməsi Əli Kərimlinin dırnaqarası “siyasi uzaqgörənliyi”nin nəticəsidir.
Lakin ən təhlükəli məsələ partiyanın millətə və dövlətə qarşı birləşən qüvvələrin ocağına çevrilməsidir.
Əslində, hər bir partiyanın məqsədi hakimiyyət uğrunda mübarizə aparmaqdır və bu mübarizənin yolu seçkilərdən keçir. Cəmiyyətdəki nüfuzunu ötən illər ərzində sürətlə itirən radikal cəbhəçilər bunun səbəbini içlərində, Kərimli və onun qaragüruhçu komandasının qərarlarında axtarmaqdansa, cəmiyyəti və dövləti hədəf seçdilər. Son zamanlar isə bu fəaliyyət bütün əndazəsini aşaraq milli ləyaqətin tapdalanması, xalqın aşağılanması, xalqın onların populist tələblərinə gözlədikləri reaksiyanı verməməsinin yaratdığı isterika üzərindən qurulur.
AXC təmsilçilərinin terrorçu şəbəkənin üzvləri kimi davranması, ölkə hüdudlarından kənarda dövlət əleyhinə təbliğat aparan trol dəstəsinin verdiyi təhlükəli mesajlar Kərimli dəstəsinin artıq nəinki siyasi resurslarını tükətdiyi, o cümlədən mənəvi deqradasiyaya uğradığı anlamına gəlir. “Milyarderlər İttifaqı”nın ideoloji ruporu rolunda çıxış edən Milli Şura adlı qurumda milli maraqlara deyil, xarici agenturanın tələblərinə xidmət edən Əli Kərimli, Cəmil Həsənli, Gültəkin Hacıbəyli və digərləri haqqında ortaya çıxan faktlar, onların uzun müddət hakimiyyət strukturlarında kök salmış bəzi şəxslərlə gizli əlaqələri barədə məlumatlar AXC-nin gizli düşmən şəbəkəsi qurduğuna şübhə yeri qoymur.
Təbii müşahidələr də göstərir ki, cəbhəçi tör-töküntülər artıq siyasi hakimiyyət uğrunda mübarizənin sivil yollarından uzaqlaşaraq hədəf olaraq iqtidarı deyil, dövləti və xalqı seçiblər. Öz resursları ilə hansısa dəyişikliyə və xalq dəstəyinə ümid bəsləməyən Kərimli və onun kimi Milli Şurada təmsil olunanların xaricdəki anti-Azərbaycan qüvvələrinə “yaşıl işıq” yandırmaları millətə və dövlətə ən böyük xəyanətdir.
30 ildən sonra torpaqlarımızın azad edilməsi, ərazi bütövlüyü və suverenliyimizin bərpasına bu qədər riyakar, nəinki riyakar, ermənidən belə düşmən münasibəti bəsləmək millət adına böyük ləkədir. Əli Kərimlinin və onunla bərabər əsl müxalifətçi adına iddialı siyasi meyitlərin şəxsi sərvəti, bu sərvəti toplayarkən dövlət strukturlarında təmsil olunan bəzi məmurlarla qanunsuz sövdələşmələrə girmələri Azərbaycan Xalq Cəbhəsi epoxasının rüsvayçı sonluğu deməkdir.
Böyük ideyalar ətrafında qurulan bir təşkilatı cılız məqsədlər uğrunda mobilizə edən, öz dövlətinə və xalqına qarşı düşmən mövqeyə keçənlərin yığnağına çevrilən bir quruma rəhbərlik edənlər öz cəzalarını almalıdır.
Belə bir fəaliyyət forması bağışlanmazdır və kimsə hansısa imtiyaza ümid edə bilməz.
Əgər cəbhə dəstəsi dövlətin bünövrəsini sarsıtmaq, dəyərlərimizi tapdalamaq üçün xarici mərkəzlərlə təmaslar qurursa, bunun haqq qazandıracaq izahı ola bilməz. Bu baxımdan AXC-nin bir siyasi təşkilat kimi ləğvi məsələsi faktiki, zamanın tələbi kimi səslənir. Əli Kərimli, Cəmil Həsənli və digərləri bu təşkilatdan xalqı zəhərləyən çürük fəlsəfələrini yaymaq üçün vasitə kimi faydalana bilməz.
Ötən əsrin 90-cı illərində formalaşan AXC-nin ideallarını şəxsi maraqları naminə çeynəyən şəxslər, Azərbaycanı başqa ölkələr qarşısında təslimçi duruma salmağa çalışanlar, ordumuza, əsgərimizə, zabitimizə, qazimizə nifrət püskürən Kərimli kimilər tarix qarşısında cavab verməlidir. Qazini dövlətə üsyan etməməkdə, vətəndaşı dövlətə itaətsizlik göstərməməkdə suçlayan, polisi, ordunu təhqir edən bir dəstə tam bir terror yuvasıdır və onunla müzakirə masasına oturmağa lüzum belə yoxdur.
Son proseslər bir daha təsdiqləyir ki, Əli Kərimli, Cəmil Həsənli, Gültəkin Hacıbəyli kimilər insanların şüuruna təcavüz edərək onları zombiləşdirir, öz çirkin planlarına alət edir və bu günə qədər Kərimli kimilərinə inananların ağrı-acıları üzərindən sərvət toplayıblar. Başqa sözlə desək, AXC-nin dırnaqarası “işıqlı ideyaları”na aldanan vətəndaşları mənəvi istismara məruz qoyaraq milli zəmində qarşıdurma, vətəndaş müharibəsi və ən nəhayət, xarici müdaxilə üçün zəmin yaratmaq üçün zəmin yaratmağa cəhdlər göstəriblər.
Və bu da son...
İndi nə Kərimli, nə Həsənli, nə Hacıbəyli, nə də digər “bəylər” və “xanımlar” düşdükləri duruma görə kimisə günahlandırmamalı, dövlət və xalqa qarşı düşmənçiliyin bədəlinin ağır olduğu həqiqətini qavramalıdırlar. Qavramaq üçün isə onların kifayət qədər vaxtı olacaq. Çünki, cinayət cəzasız qalmır. Nə vaxtsa edilən xəyanət bir gün üzə çıxacaq və dövlət öz sərt üzünü həmin xəyanətkarlara göstərəcək!
Əlibala Məhərrəmzadə, Milli Məclisin deputatı
