Bizim.Media xəbər verir ki, millət vəkili Fazil Mustafa “Konstitusiya və Suverenlik İli” çərçivəsində keçirilən “Fərqliliyin rəngi” festivalında çıxışı zamanı Azərbaycanın multikultural dəyərlərinin gücündən danışıb.
Deputat qeyd edib ki, hazırda dünyanın bir çox bölgəsində etnik, dini və irqi zəmində toqquşmalar müşahidə olunur, lakin Azərbaycanda hər kəs öz inancını sərbəst şəkildə yaşamaq hüququna malikdir:
“Məhz bu yanaşma sayəsində biz demokratik və tolerant bir ölkədə yaşayırıq. Bu da öz təsdiqini Qarabağ savaşında tapdı. O müharibədə yalnız bir dinin və ya millətin deyil, ölkəmizdə yaşayan bütün xalqların nümayəndələri şəhid və qazi oldular.
Bu birliyimiz Azərbaycan cəmiyyətinin gücünü və bölünməzliyini bir daha nümayiş etdirib. Elə dərəcədə birləşdik ki, bizi etnik və dini zəmində ayırmaq mümkün deyil”.
Nəzrin Elxan, Bizim.Media
