Bank sektorunun inkişaf etməsi ilə bağlı meydanda kredit kartları dövr etməyə başladı. Bu gün bir çox müştərilər kredit kartlardan şikayətçidirlər. Ən çox sosial şəbəkələrdə rastlanan şikayətlərdən biri də kredit kartlardan əlavə məbləğin çıxılmasıdır.
Bu səbəblə daha bir vətəndaş “Kapital Bank”a məxsus “Birkart” plastik kartı ilə bağlı problem yaşayıb.
Belə ki, müştərinin “Birkart” vasitəsilə 30 manat xərclədiyinə baxmayaraq, ödəniş zamanı onun kartından 44 manat vəsait çıxılıb. Müştərinin iddiasına görə, problemlə bağlı qaynar xəttə və Bank müştəri xidməti ilə əlaqə yaratsa da heç bir fayda olmayıb və onun pulu geri qaytarılmayıb.
MÖVZU İLƏ BAĞLI:
Bank kartlarında SOYĞUNÇULUQ – Beynəlxalq və Kapital Bank necə qazanır?
Narazı müştəri sosial şəbəkə vasitəsilə kart istifadəçilərini daha diqqətli olmağa çağırıb. Digər narazı müştəri isə Nazilə Xəlilova bildirib ki, sonuncu dəfə 225 manat dəyərində alış-veriş etməsinə baxmayaraq, bayram öncəsi onun kartından 237 manat məbləğ tutulub. Vəziyyət barədə bu müştəri banka müraciət etsə də problem hələ də həll olunmamış qalır.
İddiaçılara görə, bu son zamanlar demək olar ki, bir çox banklarda texniki və ya digər səbəblərdən yaşanan mütəmadi haldır.
Yaranan problemlə bağlı Kapital Bankın mətbuat katibi Pərviz Sədrəddinov Bizim.Media-ya açıqlamasında bildirib ki, bu cür məsələlər fərdi qaydada araşdırılmalıdır.
“Hazırda bu barədə ümumi bir fikir bildirmək düzgün olmaz. Çünki kreditin verilməsi, debit və taksit kartları haqqında məsələ bank tərəfindən fərdi baxılan bir məsələdir.
Əgər müştəri belə bir halla üzləşibsə, mütləq şəkildə fərdi olaraq ona yaxın olan bank filiallarına və ya 196 nömrəli məlumat mərkəzinə müraciət etməlidir. Söhbət yalnız kartın sahibindən gedir. Bu zaman kartın sahibinə məbləğin silindiyi platforma, ümumiyyətlə, əməliyyat barəsində bütün məlumatlar veriləcək. Ona görə bu məsələ haqqında bütün kredit kart sahiblərinə şamil edilib cavab verilə bilməz, bu fərdi baxılan bir vəziyyətdir. Əgər bu cür halla üzləşən müştəri varsa, buyurub bizim kanalla müraciət edib, məsələyə tam şəffaf şəkildə aydınlıq gətirə bilər”.
Vüsalə Balayeva, Bizim.Media
