Səfərbərlik və Hərbi Xidmətə Çağırış üzrə Dövlət Xidməti (SHXÇDX) tərəfindən plana uyğun olaraq Şuşa, Kəlbəcər, Laçın, Qubadlı, Zəngilan, Cəbrayıl, Füzuli, Ağdam, Xocalı və Xocavənd rayonları üzrə təhsil müəssisələrində fəaliyyət göstərən çağırışaqədərki hazırlıq rəhbərləri ilə vebinar təşkil olunub.
Bizim.Media xəbər verir ki, bu barədə Xidmətdən məlumat verilib.
Vebinarda çıxış edən SHXÇDX-nin baş idarə rəisinin müavini polkovnik Azər Babayev ötən il sentyabr ayının 27-də Ermənistanın növbəti təxribat cəhdinə cavab olaraq Azərbaycan Silahlı Qüvvələrinin həyata keçirdiyi genişmiqyaslı əks-hücum əməliyyatının hərb tariximizə qızıl hərflərlə yazıldığını bildirib.
MÖVZU İLƏ BAĞLI:
Çağırışçılar xidmət yerləri haqqında məlumatlandırıldı
A.Babayev Müzəffər Ali Baş Komandanımız cənab İlham Əliyevin dəmir iradəsinin, Silahlı Qüvvələrimizin əzminin və peşəkarlığının, respublikanın iqtisadi gücünün, xalqın birliyinin Böyük Zəfərin qazanılmasında müstəsna əhəmiyyət daşıdığını vurğulayıb.
Xidmətin idarə rəisi mayor Füzuli İsmayılov Vətən Müharibəsi dövründə xalqımızın həmrəyliyinin yüksək səviyyədə olduğunu, vətəndaşların ordu sıralarına göndərilmələri üçün kütləvi formada Xidmətin yerli struktur bölmələrinə gəldiklərini xatırladıb, bunu gənc nəslin vətənpərvərlik ruhunda tərbiyə edilməsi istiqamətində həyata keçirilmiş işlərin müsbət nəticəsi kimi qiymətləndirib.
Təhsil Nazirliyinin sektor müdiri Fuad Qarayev Azərbaycan xalqının şanlı qəhrəmanlıq salnaməsi yazaraq özünün qalib xalq olduğunu bütün dünyaya sübut etdiyini və düşmən üzərində tarixi zəfər qazandığını diqqətə çatdırıb.
Vebinarda iştirak edən Şuşa şəhər 6 saylı, Füzuli rayonu Əhmədbəyli kənd tam orta məktəblərinin çağırışaqədərki hazırlıq rəhbərləri Asəf Məhərrəmov, Tofiq Əliyev və başqaları çıxış edərək mövzu ilə bağlı fikirlərini bölüşüblər.
Bizim.Media
