Ukrayna paytaxtında Bakı və Kiyev şəhərləri arasında Qardaşlaşma haqqında niyyət protokolu imzalanıb.
Bakı Şəhər İcra Hakimiyyətindən (BŞİH) Bizim.Media-ya verilən məlumata görə, niyyət protokolunu BŞİH başçısı Eldar Əzizov və Kiyev şəhərinin meri Vitali Kliçko imzalayıblar.
İmzalanma mərasimindən əvvəl çıxış edən Vitali Kliçko Bakının olduqca surətlə inkişaf etdiyini və Azərbaycan paytaxtında möhtəşəm layihələr həyata keçirildiyini bildirib:
“Biz Bakıda həyata keçirilən bəzi müasir layihələri öyrənərək Kiyevdə tətbiq edirik. Ümid edirəm ki, yaxın gələcəkdə Bakıya növbəti səfərim zamanı yeni maraqlı layihələrin şahidi olacağam”.
Kiyev şəhərinin meri vurğulayıb ki, imzalanan yeni niyyət protokolu iki dost şəhər arasında iqtisadi, ticarət, mədəniyyət, turizm sahələrində əməkdaşlığı daha da gücləndirəcək.
E.Əzizov isə yeni niyyət protokolunun iki şəhər arasında əlaqələri yeni müstəviyə çıxaracağını bildirib:
“Bakı və Kiyev şəhərləri arasında əməkdaşlığın inkişafı bizi sevindirir. Ukrayna paytaxtında da maraqlı layihələr həyata keçirilir və biz bu səfər çərçivəsində bunun şahidi olduq”.
Görüşdə iki şəhər arasında 1997-ci ildə imzalanmış əməkdaşlığa dair saziş əsasında mövcud qardaşlaşma əlaqələrinin daha genişləndirilməsi barədə qərar qəbul edilib.
Görüşdə Kiyev meriyasına və Ukraynanın KİV nümayəndələrinə erməni millətçilərinin işğal altında olmuş ərazilərimizdə törətdikləri vandalizm faktlarını əks etdirən foto-albomlar təqdim edilib.
İmzalanma mərasimində Azərbaycanın Ukraynadakı səfiri Elmira Axundova da iştirak edib.
Bizim.Media
