Ədəbiyyat dərsliklərində milli-ədəbi təbliğin miflərlə, təhriflərlə və ideoloji əlavələrlə yüklənərək elmi əsaslardan uzaqlaşdırılması gündəmə gəlib.
Bizim.Media xəbər verir ki, bu barədə filologiya üzrə fəlsəfə doktoru, Nəsimişünas alim Səadət Şıxıyeva öz paylaşımında bildirib.
O, qeyd edib ki, Azərbaycan ədəbiyyatının tədrisi və təbliği nağıllar, uydurmalar və s.-dən xilas edilib tarixi gerçəkliyə uyğun qurulmalıdır:
“Nizaminin saraylardan uzaqdakı fəaliyyətinin biryönlü təqdimi şəxsiyyəti haqqında yanlış təsəvvür yaradır. Onun neçə dəfə evlənməsinin xüsusi vurğuyla orta məktəb dərsliyinə salınmasının nə əhəmiyyəti var?
Nəsiminin Şamaxı doğumlu olmasının israrla bildirilməsi, diri-diri dərisi soyularkən şeir söyləyəcək qədər supergüc sahibi kimi tanıdılması, Füzulinin Azərbaycandan olduğunu sübut üçün Ağcabədinin Hindarx kəndindən olması nağılının uydurulması Azərbaycan klassik ədəbiyyatının bu görkəmli nümayəndələrinin yalnız və yalnız təhrifli və elmsiz təqdimidir”.
Alim qeyd edib ki, şairlərin həyat yolu və şəxsiyyəti tarixi qaynaqlara söykənən faktlar əsasında, tarixi gerçəkliyə uyğun təqdim olunmalı, dünyagörüşlərinin tədrisində sovet ideologiyasının təsirindən azad olan elmi biliklərə söykənilməlidir.
Şəfiqə Şəfa, Bizim Media
