Ötən gün gecə saatlarında paytaxtın Xətai rayonunda piyadanın xəsarət alması ilə nəticələnən yol-nəqliyyat hadisəsi baş verib.
Bizim.Media “qafqazinfo.az”a istinadla xəbər verir ki, Gəncə prospektində eynisəviyyəli piyada keçidinin yaxınlığında iki minik avtomobili toqquşub.
Belə ki, maşınlardan biri yolu keçidlə keçən şəxsə yol verərkən arxadan gələn digər nəqliyyat vasitəsi ona çırpılıb. Öndəki avtomobil idarəetmədən çıxaraq piyadanı vurub. Xoşbəxtlikdən piyada yüngül xəsarətlərlə qurtula bilib.
Qəza yerindən çəkilmiş görüntülərdən məlum olur ki, qəzanın baş verdiyi gecə saatlarında Gəncə prospektinin işıqlandırılması dayandırılıb.
Hadisə şahidlərinin sözlərinə görə, həmin piyada zolağı məhz qaranlıq səbəbindən sürücülər tərəfindən yaxşı görünmür. Bu da ərazidə ciddi təhlükə yaradır. Sakinlər eyni zamanda prospektdə işıqlandırmanın olduğunu, lakin sutkanın müəyyən saatlarında söndürüldüyünü əlavə ediblər.
Xətai Rayon İcra Hakimiyyəti başçısı aparatının şöbə müdiri Pənah İmanov bildirib ki, məsələ ilə bağlı araşdırma aparılacaq və küçənin işıqlandırılması ilə bağlı məsələ nəzarətə götürüləcək.
Bizim.Media
