Sumqayıt Ağır Cinayətlər Məhkəməsində kafedə qonşusunu bıçaqlamaqda təqsirləndirilən Tərlan Nemətovun cinayət işi üzrə məhkəmə prosesi başa çatıb.
Bizim.Media oxu.az-a istinadən xəbər verir ki, hakim Fəhmin Hümbətovun sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə T.Nemətov yeddi il azadlıqdan məhrum edilib.
İttihama görə, hadisə Sumqayıt şəhəri, H.Z.Tağıyev qəsəbəsi ərazisindəki "Balıqçı" kafesində baş verib.
Qeyd edək ki, Sumqayıt şəhər sakini T.Nemətov spirtli içki qəbul edib "Balıqçı" kafesinə gəlib və orada yenidən pivə sifariş vermək istəyib.
Kafedə ofisiantı axtaran Tərlan orada Sumqayıt sakini Elmar Qədimovla rastlaşıb. Bu vaxt Elmar Tərlanı nalayiq ifadələrlə təhqir edib, kafedən çıxarıb. Nəticədə onlar arasında mübahisə yaranıb və T. Nemətov kafenin həyətində üzərində gəzdirdiyi bıçaqla Elmar Qədimovu bıçaqlayıb.
E.Qədimovun xəsarət aldığını görən Tərlan hadisə yerindən qaçıb şəhər ərazisindəki məktəblərdən birinin həyətində gizlənib.
Keçirilən əməliyyat-axtarış tədbirləri nəticəsində hadisəni törətməkdə şübhəli bilinən T.Nemətov saxlanılıb.
Bizim.Media
