Biləsuvarda saxta araqlar aşkarlandı – FOTO

Biləsuvar rayonunda yerləşən topdan satış obyektində saxtalaşdırma əlamətləri olan alkoqollu içkilər aşkarlanıb.

Bu barədə Bizim.Media-nın yerli bürosuna Azərbaycan Qida Təhlükəsizliyi Agentliyində (AQTA) məlumat verilib.

Qurumun Şirvan-Salyan Regional Bölməsi tərəfindən Heydər Əliyev prospektində, vətəndaş müraciəti əsasında plandankənar yoxlama həyata keçirilib.

Yoxlama zamanı Nağıyev Samir Nizami oğluna məxsus topdan satış obyektinin anbar hissəsində ümumilikdə 270 ədəd saxtalaşdırma əlaməti daşıyan alkoqollu içki məhsulu aşkar edilib. Müəyyən olunub ki, bu məhsullar normalara uyğun istehsal edilmiş içkilərin eyni marka adı ilə saxtalaşdırılıb.

Faktla bağlı obyektin məsul şəxsi barəsində İnzibati Xətalar Məcəlləsinə uyğun olaraq protokol tərtib olunub. Aşkarlanmış məhsullar müvafiq qaydada saxlanca götürülüb, nümunələr isə laborator analiz üçün aidiyyəti üzrə göndərilib. Analizlərin nəticələrinə əsasən qanunvericiliyə uyğun tədbirlər görüləcək.





Sabutay Nağıyev, Bizim.Media, Cənub bürosu