Xəbər verdiyimiz kimi, dünən Bakıda dəhşətli yol qəzası baş verib. “BYD” markalı avtomobil sürətlə hərəkət edərək Heydər Əliyev prospektinin kənar yolunu kəsən beton maneəni dağıdaraq yolun əsas hissəsinə düşüb. Hər kəsin dəhşətlə izlədiyi qəza görüntüləri sosial şəbəkələrdə geniş müzakirə olunur.
Amma ən çox müzakirə olunan və qınanılan isə “Embawood” şirkətinin qorxunc qəzadan, bədbəxt hadisənin görüntüsü üzərindən özünü reklam etməyə çalışmasıdır.
MÖVZU İLƏ BAĞLI:
“Embawood”dan o qəza ilə bağlı biabırçı reklam paylaşımı – FOTO
Qeyd edək ki, mebel satışı ilə məşğul olan şirkət qəzadan görüntüləri montaj edərək “Belə sürətlə, həm də təhlükəsiz - sifarişiniz ən qısa zamanda qapınızda!” başlığı ilə paylaşıb.
Mövzu ilə bağlı şirkətlə əlaqə saxladıq.
“Embawood”un Rüstəm adlı əməkdaşı Bizim.Media-ya absurd açıqlama verib. O, məsələnin araşdırıldığını və bir neçə günə, daha dəqiqi, gələn həftəyə açıqlama veriləcəyini deyib.
“Niyə bu qədər gec? Nəyi araşdırırsınız, reklamdan şirkət xəbərsiz olub” sualına isə əməkdaş çox “nəzakətlə” cavab verib:
“Bizim işimizi bizə öyrədirsiniz? Məlumatı gözləyin!”
P.S.Nə deyirik ki, gözləyək. Amma əməkdaşı mediaya çəmkirən üzrü günahından böyük şirkətin verəcəyi heç bir açıqlama uğursuz reklam paylaşımını unutdura bilməyəcək.
Rəna Cumaqızı, Bizim.Media
