Bakıda çəki almaq, arıqlamaq üçün dərmanlar satıldığı kimi boyun uzanmasına da kömək etdiyi bildirilən dərmanlar təklif olunur. Şəhərdəki reklam lövhələrində reklam olunan dərmanlardan övladının ucaboy olmasını istəyən valideynlər alıb istifadə edirlər.
Bəs bu dərmanların boy artımına köməyi təsdiqini tapıbmı? Hansı yaşda uşaqlar bundan istifadə edə bilərlər?
Bu barədə Bizim.Media-ya açıqlamasında pediatr Vaqif Qarayev deyib ki, əvvəlcə boy artımına mane olan səbəblər araşdırılmalı, bu haqda həkimin qərarı olmalıdır:
“Valideyn nə qədər özünü gözəlləşdirsə də, onun uşağı özünün əvvəlki vəziyyətinə oxşayacaq. Yəni təbiəti məcbur etmək olmaz. Azərbaycanlı düşüncəsi var, biz istəyirik ki, uşaqlarımız boylu-buxunlu, alyanaqlı, toppuş olsun. Olmursa, nə edək?! Bunun ciddi tibbi səbəbi yoxdursa, təbiətin ixtiyarına buraxaq. Əvvəl uşaqların yaşına görə boy və çəkinin həddi olan cədvəllər var idi. İndi başqa forma yaranıb, yəni ananın və atanın boyunu müəyyən əmsallara vurub, bölərək normativ çıxarırlar.
Uşağın boyu normaya uyğun deyilsə, onda gərək artıma mane olan səbəblər araşdırılsın. Biləklərdəki sümükdə boy zonaları var, rentgen onu bizə göstərir. O zonalar bağlanmayıbsa, boy artacaq, bağlanıbsa, başqa tədbirlər görmək lazımdır. Əvvəlcə bağlanma səbəbini öyrənməliyik. Bunlar hamısı normaldırsa, səbəbi irsiyyətdə axtarmalıyıq.
Beş anadan 7-si deyir ki, uşağın boyu balacadır. Axı ananın da boyu balacadır, təbiət bunu belə yaradıb. İrsiyyəti heç kim qəbul eləmir. Valideynlərin istək və arzusuna qatılıram, amma bu, zorakılıqla olmur. Yəni irsidirsə, heç nə edə bilməyəcəyik”.
Həkim, valideynləri belə dərmanları həkim göstərişi olmadan almamağa çağırıb:
“Apteklərdə çəki artıran dərmanlar da var. Qətiyyən istifadə etmək, orqanizmi məcbur olmaz. İndi xanımlar arıqlamaq həvəsinə düşüblər, bu da olmaz. Arıqlamaq üçün dərman qəbul edənlərdə bunun nə qədər fəsadlarını görürük. Zorla arıqlamaq, kökəlmək, boy artırmaq düzgün deyil.
Bunlara mane olan tibbi səbəblər yoxdursa, həyat tərzini dəyişmək lazımdır. Yemək-içmək, istirahət edərək yaşamaq lazımdır. Altından qırmızı xətt çəkərək deyirəm ki, heç bir valideyn özbaşına boy artıran dərman almasın. Hələ o dərmanların faydasının olması da sual altındadır. Sadəcə sahə həkiminə, pediatr və ya endokrinoloqa müraciət edirək yuxarıda sadalananları müayinə etmək və qərar vermək lazımdır”.
Günay Şahmar, Bizim.Media
![“Boy artıran” dərmanlarla bağlı XƏBƏRDARLIQ – “Özbaşına istifadə etsəniz...” “Boy artıran” dərmanlarla bağlı XƏBƏRDARLIQ – “Özbaşına istifadə etsəniz...”](https://bizim.media/file/articles/2024/09/03/1725372154_photo_5384157628193694383_x.jpg)
- A-
- A
- A+
Cəmiyyət
10:40 / 04.09.2024
“Boy artıran” dərmanlarla bağlı XƏBƏRDARLIQ – “Özbaşına istifadə etsəniz...”
Hazırda oxunan: “Boy artıran” dərmanlarla bağlı XƏBƏRDARLIQ – “Özbaşına istifadə etsəniz...”
Hazırda oxunan: “Boy artıran” dərmanlarla bağlı XƏBƏRDARLIQ – “Özbaşına istifadə etsəniz...”
209816
© Materiallardan istifadə edərkən hiperlinklə istinad olunmalıdır.
Mətndə səhv varsa, onu qeyd edib ctrl + enter düyməsini basaraq bizə göndərin.
Mətndə səhv varsa, onu qeyd edib ctrl + enter düyməsini basaraq bizə göndərin.