Sosial sahədə aparılan işlərin bir istiqaməti olaraq DOST, reabilitasiya, peşə hazırlığı mərkəzləri şəbəkəsinin bölgələr üzrə genişləndirilməsi işləri davam edir. Bu barədə Əmək və Əhalinin Sosial Müdafiəsi Nazirliyində keçirilən növbəti kollegiya iclasında bildirilib.
Nazirliyin İctimaiyyətlə əlaqələr şöbəsindən Bizim.Media-ya verilən məlumata görə, əmək və əhalinin sosial müdafiəsi naziri Sahil Babayev regionlarda əhalinin DOST, reabilitasiya, peşə hazırlığı xidmətlərinə əlçatanlığının artırılmasının, bu məqsədlə müvafiq xidmətləri göstərəcək yeni müəssisələrin yaradılmasının əsas prioritetlərdən olduğunu qeyd edib.
İclasda son illərdə bu sahədə mühüm addımlar atıldığı diqqətə çatdırılıb. Bildirilib ki, artıq 7 DOST mərkəzi, Zəngilanın Ağalı kəndində “Smart DOST” xidmət məntəqəsi, Şuşa şəhərində Qarabağ Regional DOST Mərkəzinin filialı açılıb.
Həmçinin nazirliyin 12 reabilitasiya və sosial xidmət müəssisəsi müasir tələblərə uyğun qurulub, Qəbələ və Şəmkirdə Uşaq Reabilitasiya mərkəzləri tikilərək istifadəyə verilib. Naxçıvan Muxtar Respublikasında da yaxın aylarda Regional DOST Mərkəzi açılacaq. Həmçinin Naxçıvanda DOST İnklüziv İnkişaf və Yaradıcılıq Mərkəzinin, muxtar respublikanın rayonlarında DOST filiallarının yaradılması nəzərdə tutulur.
Hazırda Quba, Sabirabad, Sumqayıt, Gəncədə DOST mərkəzlərinin tikilməkdə olduğu, Masallıda da bu il DOST Mərkəzinin inşasına başlanılacağı qeyd edilib. Şəkidə DOST mərkəzinin, bir sıra rayonlarda DOST filiallarının, Şəki, Quba, Sabirabad, Masallıda peşə hazırlığı, Ağcabədi və Qubada uşaq reabilitasiya mərkəzlərinin və s. yaradılması üçün aparılan layihələndirmə işləri diqqətə çatdırılıb. Kəlbəcərdə əlilliyi olan şəxslər üçün reabilitasiya, bir sıra rayonlarda sosial xidmət müəssisələrinin yaradılacağı bildirilib.
Sosial xidmətlər sahəsində görülən işlərdən bəhs olunub. Bu il 4,3 min nəfər tənha ahıl və əlilliyi olan şəxsə evlərində (səyyar) sosial-məişət xidmətlərinin göstərildiyi, 2,2 mindən çox şəxsin stasionar və yarımstasionar şəraitdə sosial xidmətlərlə təmin edildiyi,107 uşağın övladlığa verildiyi qeyd edilib.
Sosial Dəstək Mərkəzinin aztəminatlı ailələr və digər həssas qruplarla bağlı icra etdiyi layihələr, həmçinin uşaqların müəssisələrə düşməsinin qarşısının alınması istiqamətində reinteqrasiya tədbirləri diqqətə çatdırılıb.
Əmək Bazarı və Sosial Müdafiə Məsələləri üzrə Milli Observatoriya tərəfindən bu il təhlil və tədqiqat, sorğu və monitorinq istiqamətlərində görülmüş işlər, əmək bazarının mövcud vəziyyəti və perspektiv inkişaf meyillərinin öyrənilməsi üçün aparılan təhlillər barədə məlumat verilib.
İclasda DOST xidmətləri, reabilitasiya, peşə hazırlığı mərkəzləri şəbəkəsinin genişləndirilməsi, sosial xidmətlər, həssas qruplarla bağlı sosial dəstək layihələrinin icrası və digər sahələrdə görülən işlər, qarşıda duran vəzifələr müzakirə olunub, daha 44 peşə və kvalifikasiya standartı təsdiq edilib.
Bizim.Media
![Yeni DOST, reabilitasiya, peşə hazırlığı mərkəzləri yaradılır Yeni DOST, reabilitasiya, peşə hazırlığı mərkəzləri yaradılır](https://bizim.media/file/articles/2024/08/31/1725126881_06b9f3d19be3122b73e5a2d6231a7c11.jpg)
- A-
- A
- A+
Cəmiyyət
06:16 / 01.09.2024
Yeni DOST, reabilitasiya, peşə hazırlığı mərkəzləri yaradılır
Hazırda oxunan: Yeni DOST, reabilitasiya, peşə hazırlığı mərkəzləri yaradılır
Hazırda oxunan: Yeni DOST, reabilitasiya, peşə hazırlığı mərkəzləri yaradılır
209307
© Materiallardan istifadə edərkən hiperlinklə istinad olunmalıdır.
Mətndə səhv varsa, onu qeyd edib ctrl + enter düyməsini basaraq bizə göndərin.
Mətndə səhv varsa, onu qeyd edib ctrl + enter düyməsini basaraq bizə göndərin.