Ulu babaları Göygöldə məskunlaşmış ALMAN TURİST – “İndi də evimizdə dolma bişiririk” – FOTO 

“Mən Almaniyanın Bavariya şəhərindən gəlmişəm. Göygöl rayonuna, əcdadlarımın yaşadıqları yerləri gəzmək, baxmaq üçün kiçik oğlumu da gətirmişəm. İstəyirik ki, ulu babalarımızın yaşadıqları yerlərə səyahət edək və az da olsa onların yaşayış tərzləri ilə yaxından tanış olaq. 

Mənim ulu babamın familiyası Onqemax olub. Babam ilk alman koloniyaçılarından olub. 1819-cu ildə Almaniyanın Altbulax vilayətindən o zaman Yelizavetpol adlanan şəhərin yaxınlığında Helenendorf qəsəbəsini yaradanlardan biri olub. Onun adı Yohanes idi. Babamın burada böyük ailəsi olub. O, həyat yoldaşı və övladları ilə birlikdə 1941-ci ilə qədər, yəni müharibə başlayana qədər burada  yaşayıb. Sonra onları Qazaxıstana sürgün ediblər. Biz yalnız 1992-ci ildə Almaniyaya qayıda bildik”. 

Bu fikirləri Bizim.Media-nın yerli bürosuna hələ 19-cu əsrin əvvəllərində indiki Göygöl, o zamanlar Helenedorfda məskunlaşmış alman kolonisti Yohanes Onqemaxın kötücəsi Aneta Şrayner verib. 


Onun sözlərinə görə hələ Qazaxıstanda sürgündə yaşadıqları illərdə nənələri Helenedorf haqqında onlara çox danışardı:

“Nənəm həmişə deyərdi ki, Azərbaycan çox gözəl ölkədir. Ulu babalarımız orada məskən salıb yaşayıblar. Həmişə azərbaycanlıları mehriban, gülərüz, qonaqpərvər, səmimi insanlar kimi xatırlayardı. Tez-tez Azərbaycan mətbəxindən, adət-ənənələrindən söhbətlər edərdi. Bu gün də bizim evimizdə qədim Azərbaycan yeməyi olan dolma bişirilir. Biz Qazaxıstanda olanda həmin yeməyin adını bükmə adlandırırdılar. 

Amma nənəm həmişə onlarla bu barədə mübahisə edərdi və deyərdi ki, dolmanı bizim nənələrimiz Helenendorfda bişiriblər və azəraycanlıların ən dadlı yeməklərindəndir”, -  deyə A. Şrayner öz fikirlərini bölüşüb. 


Bu gün Göygölün küçələrini gəzəndə böyük sevinc yaşayan qonaq burada hələ də alman abidələrinin və evlərinin, alman arxitekturasının qorunub saxlandığını görəndə sözün əsl mənasında təəccübünü gizlətməyib:

“Mən kilsədə oldum, sonra bir zamanlar alman evləri olan binalara baxdım. Təəssüratım çox böyükdür. Kolonistlərin nümayəndələrindən sonuncusu olan alman Viktor Klaynın evi isə məni lap kövrəltdi. Burada hər şey əsl alman evindəki kimidir. Sanki uşaqlığıma qayıtdım. Elə bil öz evimizdəyəm. 

Heç bu vaxtın bitməsini istəmirəm. Kitablar, piano, radio, telefon, bütün əşyalar mənə əcdadlarımı xatırlatdı. Mən hər əşyanı oğluma göstərirdim. Qoy, o da ulu babaları, onların həyat tərzləri və yaşayışlarından xəbərdar olsun. Mən bu alman kolonistlərinin, mənim əcdadlarımın tarixini  belə yüksək səviyyədə qoruyub saxlayan Azərbaycan xalqına dərin minnətdarlığımı bildirirəm. Ümidvaram ki, nə vaxtsa bir də buraları gəlib görmək mənə də, mənim nəvələrimə də qismət olacaq”, - deyə Aneta Şrayner əlavə edib. 








Məqsəd Rəhimov, Bizim.Media, Qərb bürosu