Şimal-Qərb bölgəsində havanın temperaturu kəskin ENDİ 

Şimal-Qərb bölgəsində ötən gündən başlayan yağıntılı hava bu gün də fasilələrlə davam edir. 

Bizim.Media-nın yerli bürosu Şəki Regional Hidrometeorologiya Müəssisəsinə istinadən xəbər verir ki, bu gecə bölgənin əksər dağlıq ərazilərində temperatur mənfi 2, aran ərazilərdə isə 0 dərəcə təşkil edib. 

Son iki gündə havaların müsbət 20-21 dərəcədən 0-a enməsi, hətta mənfi təşkil etməsi iqlim dəyişmələrinə bariz misaldır. 
Hazırda bölgədən keçən Qaraməryəm-İsmayıllı-Şəki və Şəki-Qax avtomobil yollarının bəzi hissələrində, eləcə də dağətəyi yaşayış məntəqələrinə gedən yollarda çiskinli-dumanlı hava şəraiti hökm sürür. Bu yollardan istifadə edən sürücülərdən xahiş edilir ki, sürət həddini aşmadan ehtiyatlı olsunlar. Havaların soyuması və qeyri-sabit keçməsinə baxmayaraq, bu günlər bölgə rayonlarında elektrik enerjisinin və mavi yanacağın verilməsində, eləcə də rabitə xətlərində heç bir problem qeydə alınmayıb. 

Tural Rasim oğlu, Bizim.Media, Şimal-Qərb bürosu