Paytaxtın tıxaclarına ÇARƏ – Skuter və velosipedlərdən istifadə NƏYİ DƏYİŞƏCƏK?

“Bu gün Bakı şəhərində yerüstü səfərlərimizin 60-70 faizi avtobusların, 30-40 faizi isə taksilərin payına düşür. Amma avtobusların üstünlükləri çox azdır və hazırda bunun üzərində işlər gedir. Taksilərlə edilən səfərlərin orta məsafəsi isə 1-3 kilometrdir ki, bunu da mikromobil vasitələrlə başa vurmaq olar”. 

Bu sözləri Bizim.Media-ya açıqlayan nəqliyyat sektoru üzrə ekspert Rauf Ağamirzəyev bunlardan birinin piyada səkiləri olduğunu deyib:

“Digəri isə velozolaqlardır ki, bunlarla da velosipedlərin və skuterlərin hərəkətini təmin etmək olar. Buna da artıq Bakı Şəhər İcra Hakimiyyəti binasının qarşısından başlayıblar. Bakının gələcək vizual görüntüsü artıq formalaşır. İstiqlaliyyət küçəsi paytaxtda geniş səkilərə malik olan yeganə küçədir. Burada velozolağın təşkili ilk növbədə mikromobil vasitələri üçün yeni imkanlara səbəb olacaq, digər tərəfdən isə ictimai nəqliyyatın hərəkətini tənzimləyəcək. 

Ardınca isə Azərbaycan və Bülbül prospektlərində, eləcə də Mirzağa Əliyev küçəsində xətlərin çəkilməsi planlaşdırılır. İlkin mərhələdə bəzi çatışmazlıqlar ortaya çıxacaq.

Bunlara da cavab veriləcək. Əvvəlcə konflikt nöqtələrin idarə olunması məsələsini qeyd etməliyik. Belə ki, əgər zolaq dayacanacağın qarşısından keçərsə, bunu dərhal həll etmək və dayanacağı bir qədər də irəli çəkmək olar. Elə etmək lazımdır ki, bir hərəkət iştirakçısı digərinə mane olmasın”. 

“Cərimələr tətbiq olunmalıdır”

Ekspert vurğulayıb ki, zolaqlar çəkildikdən sonra sərt nəzarət tədbirləri aparılmalıdır:

“Avtobus xəttləri ilə bağlı problemləri bu sahədə də qaldırmaq lazımdır. Çünki sərt nəzarətin olmadığı istənilən infrastrukturla bağlı mexanizmlər əksər hallarda işlək olmur. Əgər bu xətlər yaradılırsa, o zaman buna mane olan bütün hallar aradan qaldırılmalı və müəyyən cəzalar, yaxud cərimələr tətbiq olunmalıdır. 

Ona görə ki, əgər burada hərəkət varsa, deməli, təminat olmalıdır. Eyni münasibət piyada səkilərindəki, piyada xətlərindəki və avtobus dayanacaqlarındakı yanlış park etmələrə qarşı da göstərilməlidir. Bir sözlə, hərəkətə maneə yaradan istənilən avtomobil sahibi cərimə olunmalıdır. Əgər eyni hal təkrarlanarsa, o zaman sürücülük vəsiqəsindən müvəqqəti məhrum olunmalıdır. 

Bundan başqa zolaqlarda xüsusi qurğularla və ya plastik sədlərlə fiziki ayırmalar etmək lazımdır ki, kimsə ora daxil ola bilməsin, nəticədə skuter və velosipet sürənlər rahat hərəkət edə bilsinlər”. 

Ekspert bildirib ki, az xərc çəkib, bu cür alternativlərdən istifadə etməklə tıxacdan qurtulmaq mümkündür: 

“Üstəlik, vətəndaşları buna yönləndirmək və təşviq etmək lazımdır ki, onlar bu cür ucuz və sərfəli imkanlardan istifadə etməklə, öz səfərlərini təşkil etsinlər. Hazırda paytaxtın müəyyən yerlərində skuterlər icarəyə verilir. Bu da vətəndaş üçün əlavə imkan deməkdir. Hətta skuterlərin parklanma yerləri yaradıla bilər. İş olan yerdə səhvlər də olacaq, amma əsas odur ki, işə başlayaq”. 

Onun sözlərinə görə, əgər bu xəttlər olmasaydı, şəhərdə xaos yaranacaqdı:

“Bu xəttlər olmasa, vətəndaşlar həm yolun hərəkət hissəsində, həm də səkilərdə qaydasız şəkildə öz yollarında hərəkət edəcəkdilər. Hazırkı işlər başa çatdıqdan sonra isə onların qaşısında müəyyən tələblər də qoyulacaq”.

Rövşən Ziya, Bizim.Media